Opposition i talem se jajmen blong Salwai i no afektem wok

Lida blong Opposition i talem se jajemen blong deputy lida blong opposition grup bae i no save afektem ol wok blong olketa insaed long Palamen haos.

Long wik ia,  Justice Andre Wiltens, i faenem se deputy lida blong opposition mo foma Prime Minister, Charlot Salwai Tabimasmas, i guilty long jaj blong perjury.

Honoroble Ralph Regenvanu i talem se kes ia hemi kes blong wan individual o wan persen nomo mo opposition bae i stanap blong kivim sapot long Mr Salwai.

“Hemi wan individual jaj blong wan individual persen mo individual ia nao we hemi Mr Salwai, bae i rispon long hem,” hemi talem.

“Mbe bae mifala i stanap redi sapos hemi nidim asistens blong mifala.”

VBTC nius i toktok wetem Mr Salwai long tete morning mo hemi talem se hemi bin ko tru long wan bigfala jalens mbe hemi talem tankiu long sapot.

Hemi talem tankiu long ol fren, ol jej memba, ol sapota blong hem mo even ol nara pipol long sapot we oli kivim long hem.

“Mi trastem jastis long Vanuatu mo mi trastem se bae mi kat raet blong mi save apil, we hemia nao bae mifala i wok long hem i ko, wael mi stap wet yet long ol sentence we bae long namba 3 February oli kivim aot,” Mr Salwai i talem.

“Mi talem tankiu long evri wan long sapot, spesel tankiu i ko long ol lawyer we oli ripresentem mi long kot kes ia.

“Olsem President blong Reunification Movement blong Change, mi asurem olgeta memba blong pati, se pati ia hemi stap solid oltaem nomata long wanem i hapen long hem.

“Mi wantem mekem i klia se kes hemi ko akensem mi nomo mo i no ko akensem pati.

“Mi wantem kivim asurens long ol memba se ol narafala executive memba oli stap mo bae oli kontinu blong wok anda long lidasip blong olketa.

Mr Salwai i bin statem kes ia long las yia kasem general eleksen blong 2020 mo long yestede nao jajmen i kamaot.

Judge Wiltens bae hemi jes kivim sentens blong hem long namba 3 February long 2021.

 

 

(Visited 930 times, 1 visits today)

About The Author

You might be interested in