Othoriti i konsen long ol niu bilding blong Malapoa College

Ol Education othoriti bae oli kat mit wetem administration blong Malapoa College long wik ia blong tokbaot ol krak we earthquake i kosem long ol niu bilding we Kavman blong China i fandem.

Long manis ia earthquake i bin kosem damej long domitori blong ol studen kel mo boy mo i mekem wari long ol tija long sefti blong ol skul pikinini we oli slip long skul.

Principal blong Malapoa College, Shem Simon, i talem se afta long diskasen bae i kat wan tim i mekem inspeksen long ol Chinese bilding ia.

Hemi talem se hemia i blong luk sapos i sef blong ol pikinini oli stil save yusum o nokat.

“Yumi mas tekem wan disisen kwiktaem,” Mr Simon i talem.

Olgeta niu bilding ia oli kam tru long wan grant mani blong ova VT1 billion we Vanuatu i saenem wetem kavman blong China.

Mbe Mr Simon i talem se afta long handing ova blong ol niu bilding long 2018, i nokat eni inspeksen long ol bilding ia blong talem se i sef long taem blong earthquake.

Acting Director General blong Ministry blong Education mo Training, Gideon John, i konfemem se i no bin gat eni lokol engina i involv long projek blong Malapoa College.

“Ministry blong Education mo Trening i no bin pat long supavisen blong bilding ia,” hemi talem.

“Kavman i nid blong involvem ol lokol enginia long eni projek we ol ovasi kavman i fandem long futja from ol lokol enginia i save gud weta blong kaontri.”

Deputy Principal blong skul, Akasten Tabi, i talem se Malapoa College i bin saspendem ol klas folem wan 5.8 earthquake we i bin hapen long manis ia long West blong Efate.

“Ol pikinini i bin fraet from insaed long wan klasrum i kat 35 studen mbe i nokat ol exit doa blong ol studen i yusum sapos earthquake i kam,” Mr Tabi i talem.

“Domitori bilding blong ol boy mo kel i krak vinis long earthquake ia.

“Ol pikinini i save yusum long gud taem mbe taem blong earthquake hemi no sef.”