Ova 100 pipol i no vot-Port Vila Municipal election

Ova 100 pipol i no vot long Port Vila Municipal election long wik ia from national ID kad isu.

Konfusen hemi kerap taem ol vota we oli rijista blong vot long Port Vila oli nosave vot from we Presiding ofisa i faenem se oli liv long rurol.

Long foret blong PMC polling stasen long Independence Park long Thursday wik ia, i fulap long ol man we oli kros.

“Mifala i kam blong vot long ol pipol blong Seaside blong help i stap insaed long eria blong Central Ward blong mifala i aksesem,” Wan lokol i talem.

“Long en blong dei, mifala i kat problem mifala i kam bae jif i handlem ol isu blong mifala.”

Wan mama i talem se taem oli ko blong stap tekem ol envelop mo ol foto blong vot, wan tawian i se sam famili we oli slip long Club Hippique bae tufala i nosave vot.

“Wan woman i talem se bae mifala i kobak long Electoral Ofis blong scanem bak ID blong olgeta, taem mifala i scanem be ID i stret nomo.”

Ol citizen ia oli kleim se i kat political interference, hemia from i kat sam pipol we oli liv long rurol oli vot olsem mama ia we i liv long Club Hippique.

“Mi vinis long wok long Tanna mo kambak long 2013, mo mi ko hed blong liv long Club Hippique naoia we mi bin aot long Seaside be mi stil vot long PMC. Mi vot vinis mi kobak outsaed, mi luk oli blokem sam man we oli liv long Seaside bifo mo oli kobak liv long ol nara ples be oli blokem olgeta blong vot.

“Mi no luk wea ples nao yu save blokem wan man we i kat raet blong vot.”

Presiding ofisa blong PMC, Fred Pakoa, i talem se disisen we oli tekem hemi beis long election law we i talem pipol i save vot long eria we oli liv long hem ova tri manis. Mo long tete oli yusum ol observa blong faenem ol man we oli no liv long seaside, be stopem olgeta blong oli no mas vot. Plante oli karem ID mo voting kad we i talem se oli liv long Seaside eria.

“Yumi introdusum loa ia naoia we i bin silip i stap blong mekem se long 2024 yumi yusum ID kad,” Mr Pakoa i talem.

“Hemia blong yumi nomo yusum red kad. Hemia nao yumi stat blong karemaot pratikol ia.”

VBTC Nius i toktok wetem Jeaman blong Electoral Ofis, Edward Kaltamat, mo hemi pointem aot se presiding ofisa hemi kat raet blong stopem wan man we hemi kiaman.

“From residency nao bae i kwalifaem yu blong yu save vot,”

“Yu we nem blong yu stap long electorol roll bae yu save vot nomo, i nokat eni samting i blokem yu.”

Ol presiding ofisa oli pointem aot se hemi wok blong electorol ofis blong mekem gud awenes bifo pipol i vot.

VBTC news hemi karem informesen se ol nara polling stasen oli experiencem semak situsen, mo plante pipol we oli liv outsaed long Port vila be oli rijista long town oli bin kam vot.

I kat araon 38,374 pipol oli rijista blong vot from 67 propos candidate blong tekem up 17 seat.

Ol ofisiol risal i sud kamaot bifo next wik,” Mr Kaltamat i talem.

 

(Visited 822 times, 1 visits today)

About The Author

You might be interested in