Ova 10,000 alej black magic-Efate

Ova 10,000 alej black magic i kolek raon long Efate long operesen prea blong Saot Malekula Mountain Evangelist.

Secretary blong Saot Malekula Mountain Evangelist, Johnros Kainding i talemaot long VBTC Nius tete long taem blong prea long Freshwota Park, Port Vila.

“Sam long ol ples ia mifala i faenem 300-600 poison long Not Efate Presbytery. Kasem long Saot Efate Presbytery i kasem 1000- 2000 rabis samting we pipol i holem taet. Naoia we i stap yumi long Saot Malekula Mountain Evangelist i karemaot ova 10,000 rabis samting we pipol i yusum long Efate aelan,” Mr Kainding i talemaot.

“Ol poson(alej black magic) we yumi stap karemaot hemi, i kat ol ring lida olgeta we oli stap wokbaot long naet, oli we oli involv long nakaimas, olgeta we oli involv long aktiviti blong kilim tinktink long bisnis. I kat sam we oli stap wokbaot blong mekem fonikesen long naet we i minim se oli slip tugeta mbe oli no mared. Ol nara samting hemi ol tink we pipol i tekem i stap insaed long system blong yumi olsem ol protekta blong protektem yumi, Yumi stap wokbaot ia mbe yumi luk se fulap long yumi i nomo trast mo fearem God. Oli kam blong tekem ol proteksen ia we oli ol nature we God i kriatem mo i tekem ples blong Bigman.

“I mekem se Papa God hemi kros mo hemi givim revelation tru long lida blong grup blong talem se yumi wokbaot mo yumi brekem daon evri pawa blong proteksen. Mo tekem Efate blong yumi blong i kambak long God. Olsem long God yumi Stanap i talem. Papa God nomo hemi creator blong yumi bae yumi nomo lukluk long narasaed blong creation.

“Yumi stap wokbaot tu blong stopem marijuana mo ol woman i nomo drink kava. Mo ol ples we yumi nosave mekem, yumi stand daon mo letem God i faetem ol isu ia blong yumi. God nao bae i komplitim wanem we yumi nosave mekem, hemia nao hemi theme blong grup. From tok blong hem i talem se wanem we yumi agri lem long wol, heaven tu i agri. Pa yumi stand daon yumi putum i ko long hand blong commanding ofisa blong hem ia i vinisim.

“Taem yumi karemaot ol rabis fasin ia yumi harem environmen i jens i nomo hevi mbe ples i laet. God hemi wan jealous God taem yumi kam blong putum ol nara samting fastaem mo bow daon long olgeta ten bae hemi kros mo ol samting we yumi stap pray from samtaem bae hemi nosave harem yumi.

“Afta tete bae grup i ko long Pakaroa eli moning mo spel kasem 18. So grup i stap long haos nomo, eni ofis we i tinktink blong karem grp i ko blong prea , grup i kat smol taem.

I kat komplen i kamaot long pablik se from wanem prea grup ia i stopem ol mama blong drink kava mbe ol papa i ko hed blong drink.

“Ol mama from oli ol onli nursery blong laef we human being i form insaed long hem; Samtaem ol mama oli drink kava mo smoke we bebe i stap insaed long basket blong bebe. Yumi drink mo smoke mo yumi spoilem ol pikinini. Hemi mesej we God i rivilim tru long Holy spirit we mifala i kam blong talemaot blong talem se nursery ia yumi mas kliarem blong i klin i stap. From fuija blong yumi, yumi no wantem ol pikinini we i kam bihaen bae i ko worst long hemia tete,” Mr Kainding i talem.

Mr Kainding i talem se Decemba 18 bae grup i endem prea program long Port Vila mo detiketem bak Efate i kobak long owna blong hem we hemi Papa God.

 

(Visited 3484 times, 2 visits today)

About The Author

You might be interested in