Ova 11,000 pipol i tekem fes COVID dos -Malekula

Ova 11,000 pipol long Malekula i tekem fes dos blong COVID vaccine.

Malampa Public Health Manager, Salome Kenneth, i talem se 17,200 pipol hemi taget populasen blong Malekula mbe health tim i manej blong stikim 11,400 pipol vinis.

Mrs Kenneth i talem tankiu long ol pipol we oli mekem raet choice blong kam tekem stik.

“Tete hemi 8 wik we tim i stap vaccinatem ol pipol long Malekula sins we lonj i stat long 12 October we turnaot hemi rili gud,” Mrs Kenneth i talemaot.

“As of yestete yumi vaccinatem ova long 11,000 pipol vinis. Yumi kat wan nara 5000 pipol nomo blong rijim olgeta blong save kasem taget populasen blong 17,200 pipol ia.

“Vaccination hemi kontinu blong operate long fix site we hemi Norsup hospitol eria.”

Mrs Kenneth i talem se oli extendem deit blong vaccination blong ko hed nomo.

“I tru i bin kat plante toktok mbe yumi luk moa pipol i stap jensem ol tinktink blong olgeta mo kam tekem stik,” Mrs Kenneth i talem.

“Ating yufala i bin harem se tete December hemi cut of deit blong stik meresin long fix site(Norsup hospital) mbe mi wantem mekem i klia se mifala i disaed nomo blong kontinu rolemaot nomo. Mrs Kenneth.

“Hemia blong givim opotuniti nomo long olgeta pipol we oli talem no long vaccine long fes ples mbe naoia oli jensem tinktink blong olgeta. Yumi luk plante long ol pipol ia i stap kam fowod blong tekem stik we hemi gud tumas.

Mrs Kenneth i talem se ol mobile tim i bin ko raon long Not East mo Not west Malekula mo komplitim vaccination long en blong Novemba.

Eria Administa blong Not West Malekula, Jerryson Hosea, i talem se turnaot blong stik long eria blong hem i pua.

“Plante pipol i stil konfus from i nokat enaf aweanes mbe afta we health tim i aot, plante pipol oli pem transpot bageken blong ko long Norsup hospitol blong tekem stik,”Mr Hosea i talem.

“Hemia i gud tumas.”

“Tim i bin stap tu long Saot East eria kaonsel we i kavremap Tisman mo Aulua ,” Mrs Kenneth i talem.

“Majoriti long ol pipol blong Unua mo Aulua i bin kam fowod blong tekem stik mbe Tisman nomo i kat plante we oli stil kat kwesten blong tekem stik mbe sapos yumi beis long eria kaonsel, plante pipol long Saot East Malekula i bin kam fowod blong tekem stik.”

Tis wik Mrs Kenneth i talem se mobile health tim i stap long eria kaonsel blong Saot Malekula blong rolemaot stik meresin blong COVID.

“Health tim i station long Lamap, even we pablik holidei long Monday wik ia, plante pipol i bin kam blong tekem stik meresin wetem long Tuesday ia,” Mrs Kenneth i talem.

“So yumi bin vaccinatem ova long 800 pipol long eli wik ia long Lamap. Long Wednesday mo Thursday ia, tim i bin muv i ko daon long Maskelyn aelan mo plante pipol i kam tekem stik.

“Tete tim bae i ko raon long ol smol aelan blong Saot Malekula olsem Avok mo Okai aelan. Long Nekis wik bae tim i muv aot long wiken ia i ko long Ahkam from hemi wan rimot ples blong save sevesem ol pipol long meinlan Akham, Farun, Botvro mo Malvakal. Afta long hem ia yumi sud muv i ko long las eria kaonsel we hemi Saot West long December 13 kasem 17 blong vaccinatem ol pipol longwe.”

Mrs Kenneth i talem se ol seken dos bae health tim i statem long December 21.

Hemi talem se Sinopharm vaccine oli stat blong rolemaot long las wik long fix site nomo we hemi long Norsup hospitol.

“Sam pipol blong Malekula we oli tekem fes dos long Vila o Santo, oli kam fowod blong tekem seken dos long plesia,” Mrs Kenneth i talem.

“Ol pipol i mas kam fowod blong tekem seken dos blong olgeta.

“Sinopharm i kat naoia long Norsup so eni wan we i wantem vaccine ia oli kam.”

Malampa Pablik Health Manager, Mrs Kenneth, i talem tankiu long evri pipol we oli mekem choice blong tekem vaccine blong protektem Vanuatu.

 

(Visited 99 times, 1 visits today)

About The Author

You might be interested in