Ova 20 seasonal woka i stak ovasi-Flaet kansel

Ova 20 seasonal woka i stak i stap naoia long airport blong Australia from Air Vanuatu flaet kanselesen long wik ia.

Air Vanuatu Boeing 737 hemi kanselem olgeta flaet blong hem long Friday i ko long Sydney mo Brisbane, Australia.

Wan Seasonal Woka long Sydney Airport we i no wantem nem blong hem i kamaot, i talem long VBTC Nius se oli no hapi.

“Mifala i stap nomo long airport from mifala i nogat ples blong ko long hem,” Woka ia i talem.

“Mifala we stap naoia ia i ova long 20 ia.

“Mifala i no hapi from Air Vanuatu i sud letem mifala se bae flaet i kansel blong mifala i no stap westem taem long plesia. Oli mekem mifala i slip long Holiday Inn long yestete naet; Mifala i jek in long 6pm long yestete long hotel afta long 10 0’klok tete moning olgeta long hotel i talem long mifala blong mas jek aot. Mifala i kam long Air Vanuatu jek in desk mbe i klos. Naoia mifala i stap nomo long airport from ples we mifala i stap wok long hem i longwe tumas.

“Naoia mifala i wet koko bae mifala kobak long hotel we Air Vanuatu i pem blong tete long naet mo oli givim vocher blong kakae. Mifala i stap staon sek long wan grup blong ol Ni-Vanuatu seasonal woka oli kam long airport mbe sek se flaet kansel.”

Wan mama we i stap long airport blong Brisbane naoia we i no wantem talemaot nem blong hem, i talem se oli sud aot long Brisbane long 07:25pm Friday naet mo kasem Vanuatu lo 11:15pm mbe flaet i kansel.

Hemi talem se sam long olgeta i spendem ten haoa long airport yestete.

“Mi jusum deit blong mi blong travel aot long Australia yesterday from tumoro hemi makem seven yia blong Papa blong mi we i ded; so mi plan se kasem Vanuatu ale bai mifala i mekem kakae long Sunday ia blong tinkbaot hem mbe naoia plan ia i nomo save wok from pua seves blong airline,” Mama ia i talem.

“Sam woka oli travel long Adelaide mo New South Wales mo kasem Brisbane eli moning finis mo long yestete we hemi Friday oli stap raon long Brisbane airport kasem we infomesen i kamaot se flaet i kansel.Samfala oli travel long plane mo train blong kasem Brisbane.

“Man plis mi wantem se oli arenjem wan nara plen blong mifala. Mi fil se mi stap westem ol holidei blong mi vinis. Mi rili wantem kambak hom.”

Wan nara wokman long New Zealand we oli stap long Blenheim i talem se oli sud bodem flaet long 12o’clok ia mbe flaet i kansel. Hemi kwestenem se hu bae i pem ol akomodesen blong olgeta naoia we oli kobak long haos. Oli ova 10 woka we i sud bodem flaet long Auckland.

“Mifala i wantem kambak from blong stap long New Zealand hemi wan nara expense,” Recognised Seasonal Employer Scheme woka i talem.

“Sapos mifala i stap bae mifala i yusum bak ol mani we blong kam spendem long famili. Evri samting long plesia mani nomo. Mi arem nomo oli talem se bae oli arenjem wan flaet blong Air Solomon Islands o Nauru, bae mifala i ko long hem mbe oli se mifala i wet kasem Sunday.”

VBTC Nius i faenem aot tete moning se Air Vanuatu flight blong Boeing 737 hemi kansel tete bakeken mo ol kastoma oli stap askem Air Vanuatu blong mas kamaot klia.

I kat infomesen se fulap pasenga oli bin kasem Airport tete moning blong kasem flaet i ko long Auckland mbe oli faenem se i kansel.

Oli talem nogud airline from communication blong hem long ol kastoma mo oli nidim explainesen blong situesen we i stap.

Wan pasenja we i no wantem nem blong hem i kamout i talem long VBTC Nius long airport tete se oli bin traem blong kolem airline long moning mbe i nogat wan ansa.

Niu Chairman blong Air Vanuatu, Willie Kalo Daniel, hemi talem se engineering problem long Airline mo oli stap wet long pat blong plane.

Problem i hapen afta we plane i bin mekem wan flaet i ko long Auckland long Thursday mo mekem tu flaet i ko long Santo.

Boeing 737 oli graondem naoia i stap.

Prime Minista, Ishmael Kalsakau hemi talem se kavman hemi stap wok long saet blem blong lukluk long Airline.

“Wok blong niufala bod hemi blong taetem ap kampani blong faenem ol wei blong ol shareholder i save muv blong sekurim wan fuija blong Vanuatu we blong luk hao best blong sevem mani mo mekem wan profit blong kampani; katem daon ol misuse blong kampani blong ol bod direkta mo kampani,” Mr Kalsakau i talemaot.

“So wan resolution we ol shareholder i mekem blong establisim ol bod blong ol direkta; mifala i talemaot aot se wan bod blong direkta bae i no entitol long wan salari. Bae oli entitol long ol alaowens long taem blong ol miting nomo we oli atendem.”

Mr Kalsakau i talem se isu ia hemi wan kwik wan blong adresem mo taem oli tekem ripot long bod blong ol direkta bae oli mekem aksen.

Ol niu bod memba i kat Willie Daniel Kalo olsem Jeaman, Eslyne Turner mo George Iapsen.

Mr Kalo i talem long VBTC Nius se bod bae hemi mit long wik ia blong faenem wei long ol jalens ia.

 

 

(Visited 5424 times, 1 visits today)

About The Author

You might be interested in