Ova 200 fake polis clearance

Ova 200 fake polis clearance i produs sins 2021 – 2022.

Wan Reliable Sos i konfemem long VBTC Nius tete se araon 250 fake polis clearence i produs.

Sos ia i talem se Polis i arestem man ia we i stap mekem ol fake polis clearence ia long eli yia ia mo hemi stap long custody wet blong pas long Kot.

Hemi talem se boy ia hemi blong Ambrym mo hemi wan IT.

“Mifala i kasem hem from ol polis clearance we hemi stap mekem i kat semak reference namba we hemi yusum,” Sos ia i talem.

Reliable Sos i talem se Vanuatu Kavman tu i mas step ap blong impruvum Polis Clearence System blong screenem gud olgeta we oli kat rabis rikod blong nomo travel.

Hemi talem se i kat tu fos memba we oli mekem rong mo bin ko long kalapus mbe naoia tufala i stap wok ovasi.

“Hemia i no stret nomo from yumi mas strict,” Reliable Sos i talem.

“Yumi no stap sendem man we hemi no blong travel.”

Sam Sos i talemaot tu long VBTC Nius long wik ia se i kat ol kes we ol pipol i stap kiaman long ol signature long ol sapot leta blong ol pastor o Jif blong ol wokman we oli wantem travel blong pat long Recognised Seasonal Employer(RSE) long New Zealand mo Seasonal Workers Program(SWP) mo Pacific Labour Scheme(PLS) long Australia.

Polis i apil strong blong pipol i stopem fasin ia from i kam antap bigwan.

Reliable Sos i talem se ol jif mo pastor long komuniti i mas wok wan blong stret jif mo pastor nomo i saenem ol leta ia.

Long penal code(Cap 135) i talemaot se fasin ia penalti blong hem, hemi 10 yia long kalapus.

“So long level blong dipatmen mi wantem apil nomo long ol license agent mo ol wokman we oli wantem stap patisipeit long Labour Mobility program we oli stap tinktink blong mekem wan pepa blong polis clearance, passport, Certificate blong Identity o medikol ripot blong karem long ol Lawful institution o ol otoriti we oli kat raet anda long loa, oli save isuem ol dokumen ia from sapos yumi no keaful bambae hemi save afektem patisipesen blong yumi long program,” Commissioner blong Labour, Murielle Meltenoven i talem.

Hemi talem se ripot nao bae i talem wanem nekis aksen blong oli tekem.

Wan nara reliable Sos i talem se saspek we i stap long jail i stat mekem fasin ia longtaem mo hemi karem bigfala mani aot long hem.

VBTC Nius i kasem infomesen se Polis nomo naoia i stap mekem polis clearance.