Ova 300 Ranwadi studen i aot long skul

Ova 300 skul studen blong Ranwadi Church blong Christ College i aot long skul from oli no hapi long kakae.

VBTC Nius i kasem infomeson se ol studen ia oli no hapi blong kakae long ol kakai we oli kam ovasi olsem Rice, nudul mo ol tin.

Jif Luke Vargo long Wali vilij long Saot Pentecost i talem long VBTC nius se oli no glad blong lukim ol pikinini blong olketa i ko bak hom long Thursday wik ia.

Hemi talem se skul i sud wok wetem eria blong Saot Pentecost blong saplaem lokol kakae.

“Yumi long saot Pentecost, yumi kat ol aelan kakae olsem Taro, manioc, cabij mo ol vegetable blong sapotem skul,” Jif Vargo i talem.

“Principal blong Ranwadi college i sud wok wetem mifala olsem givim wan smol mani ale mifala redi long ol kakae, oli kam pik ap long trak blong skul.”

Principal blong Ranwadi Church blong Christ College, Caulton Bule, i talem long VBTC Nius se skul i kat bigfala outstanding fi sins 2020.

Hemi talem se fes mo sekem term fi blong yia 2021 ol parents i no even pem.

“Parents i mas pem ol fi ia blong sapotem skul,” Principal Bule i talem.

“Kavman subsidy we bae i kam in bae i kam yet mbe mi apil long ol parents long Pentecost, Ambae mo ol parents long ol nara aelan we pikinini blong yu i skul long plesia blong mas pem ol fi ia.

“Plante long ol skul pikinini ia oli stap skul mbe ol fi blong olgeta oli no even pem.”

Mr Bule i talem tu se skul i stap yet anda long rikavari proses we Saeklon Harold i damejem bigwan skul long 2020.

Hemi askem ol skul pikinini blong oli mas ko bak long skul bakegen long Sunday from oli kat Mid-examineson long nekis wik.

 

 

 

 

 

(Visited 105 times, 1 visits today)

About The Author

You might be interested in