Ova 50 seasonal wokman long blacklist

Araon 50-100 Vanuatu seasonal wokman oli stap long blacklist blong nomo travel from oli brekem ol rul blong Seasonal Workers program.

Commissioner blong Labour, Murielle Metsan Meltenoven, i talem se ol fasen blong stap drink tumas mo ol boss blong ol farm i faenem aot, oli kat ol niu afea we i afektem ol patna mo ol pikinini long Vanuatu mo oli stap ronwe long ol farm.

Mrs Meltenoven i talem se Ofis blong Labour i gat wan stand-down polisi we oli yusum blong save putum aot wan seasonal wokman long program.

“Long ol kes we yumi kat ol brij blong ol loa long Australia, wokman hemi komitim wan ofens mo hemi stap long proses blong apia long kot blong ansarem ol ofens we hemi komitim,” Mrs Meltenoven i talem.

“Long ol kaen kes olsem ia hemi add totali long blacklist blong yumi, so i minim se hemi brijim kondisen blong visa blong hem, mo as soon as emi pas long kot, oli dilim kes, hemi subjek blong kambak long Vanuatu.

“Mo Australia hemi nomo wan port blong entri blem long futja.

Malvatumauri National Council blong ol Jif i kol long labour dipatmen blong wok kolosap wetem olgeta blong adressem ol social isu we ol wokman i fesem.

President blong Malvatumauri, Jif Wemal Tuwo Vano Jif Willie Grey Plasua, i talem se labour i nid blong wok wetem ofis blong hem blong faenem ol stret jif blong wan komuniti blong saenem ol pepa blong wokman blong ko wok ovasi.

Hemi talem se naoia eni kaen man nomo i act olsem wan jif.

Jif Plasua i talem se ol stret jif i save gud ol pipol long komuniti se oli ol wanem kaen man.

Mrs Meltenoven i konfemem tu se bae Kavman i apruvum wan Liason ofisa blong ko wok long Australia.

Hemi talem wok blong hem i blong dil wetem ol isu blong seasonal wokman.

“Jalenj blong ol social problem olsem i kam antap bigwan from i nokat wan Vanuatu Liason Ofisa long graon blong i save dil wetem ol isu ia,” Mrs Meltenoven i talem.

“Mi stap konfem se mifala i stap wok long apointmen blong hem i blong travel once Public Service Commission i kivim kliarens blong ofisa blong hemi save wok blong adresem ol wellfare blong ol seasonal wokman.

Mrs Meltenoven i kol long ol seasonal wokman long Australia mo New Zealand blong oltaem folem chanel blong communication; kolem ol otoriti long ovasi o Vanuatu sapos oli no glad long farm we oli wok long hem.

Hemi talem se evri taem bae i kat isu mbe oli mas folem stret wei blong adresem.

Commissioner Meltenoven i talem se Vanuatu Liason ofisa ia bai i travel i ko long Australia i no longtaem.