Ova 600 fama long national agrikalja wik

Ova 600 fama raon long Vanuatu bae olii soem ol lokol prodak mo kakae long akrikalja wik long Tanna.

Theme blong national wik blong agrikalja long wik ia, hemi Vanuatu i redi-Yumi ko lokol wetem Vanuatu made prodak blong bildim wan sef, secure mo resilien Vanuatu long niu nomol.

Prime Minista blong Vanuatu, Honoroble Bob Loughman, i talem long toktok blong hem se yia 2021 i spesel from i lukluk long wan niu direksen.

Prime Minista Loughman i talem se taem kavman i kam antap wetem theme olsem blong agrikalja, hu nao hemi dipen long hem blong save karemaot wok ia.

“Kavman hemi dipen long yu fama o citizen blong kaontri ia blong helpem hem blong luksave polisi direksen blong hem,” Prime Minista Loughman i talem.

Mo semtaem Prime Minista Loughman i openem wik blong agrikalja ia we bae i stap long 30 septemba kasem 3 september.

Minista blong Agikalja, Honoroble Willie Daniel Kalo, i talem se sho ia hemi tingting blong kavman i promotem mo luksave impotens blong lokol kakae.

Minista Kalo i talem se hemi impoten blong pipol blong Vanuatu i save se wik blong agrikalja hemi no wan sho we pipol oli kam patisipet nomo mo kobak long ol hom mo aelan blong olgeta.

“National wik blong agrikalja hemi wan even we i fitim pipol wetem ol niu tinktink, save mo energy blong mekem jenis long household mo komuniti raon long Vanuatu,” Minista Daniel i talem.

Hemia hemi mesej we tufala guest spika, Prime MInista Loughman mo Minista Willie Daniel Kalo i mekem long foret blong ova long 600 fama we oli stap long Laminu stadium.

Afta long opening diklaresen blong agrikalja wik ia, Prime Minista Loughman i bin lidim ol ofisol blong kavman wetem ol provins blong planem ol tri blong makem even ia.

Ol fama blong Torba provins i travel blong fo naet blong kasem Lenakel Blackman town wharf long wiken.

Wan fama i talem se hemi tekem pig, fowl mo sam yam blong Torba blong soem long sho ia.

Mo hemi fastaem we Bamboo band blong Torba i kasem Tanna tu blong selebretem even blong ol fama ia.

Ol nara fama blong ol difren pat blong Vanuatu tu i pat long sho ia.