Ova 9,000 rijista vota long Torba i vot

Ova 9,000 rijista vota long Torba i vot long wik ia blong elektem ol niu kaonsela.

Secretary General blong Torba Provins, Reynold Surmat, i talem se ol vota oli bin tenap long ol polling station blong jusum seven lida blong olgeta olsem ol kaonsela long Torba Provincial Eleksen.

Mr Surmat i talem se 25 kandidet we oli kamaot long ol difren politikol pati i kontestem eleksen ia.

“Plante pipol i ko vot mo ol poliing station i open long haf pas 7,”Mr Surmat i talem.

“Mbe polling station blong Sola i open leit smol mbe voting i ko hed gud. I kat sam administrativ wok nomo we mifala i mas kolem olgeta blong Electoral Ofis blong oli help.

“Mifala i bin manej blong muvum evri ballot box i ko long ol polling station afta we ship i dropem off nomo long ol mein bot. Olsem ol ballox box blong Merelava mo Merig ship i dropem long Gaua. Mo blong Motalava, Ureparapara, Mota, Vanualava mo Torres oli dropem off long Sola, Vanualava redi blong vot long Tuesday wik ia.

Long Unofisol risalt blong Torba provisnol elekson long yestedei i soem se ol politikol pati long kavman saed oli sekurim 4 sit mo ol pat we oli stap long palementri opposison i sekurim 3 sit.

Ol pati long kavman i kat Vanuatu Nasenal Divelopmen Pati mo Vanua’aku Pati i sekurim sit long kaonsel blong torba.

Vanuatu Nasenal Divelopmen Pati i sikurim tri sit. Long Ureparapara konstituensi, Desleyem Lency Anderson, anofisol risal i soem se hemi sikurim 154 vot. Long konstituensi blong MotaLava, Edgar Howard, anofisol risalt i soem se hemi sikurim sit ia wetem 381 vot mo long Vanualava konstituensi, Wona Jimmy, anofisol risalt i soem se hemi sikurim sit ia wetem 998 vot.

Vanua’aku Pati i sikurim wan sit long Torba provinsol elekson ia folem anofisol risalt. Long Mota konstituensi, Towia Salathiel, anofisol risalt i soem se hemi sikurim sit wetem 169 vot.

Ol politikol pati long Palementri Opposison i kat Leaders Party blong Vanuatu mo Graon mo Jastis Pati i sekurim 3 sit long Torba Proivinsol kaonsel.

Leaders Pati blong Vanuatu i sikurim 2 sit long Merelava mo Torres konstituensi. Long Merelava konstituensi, Sovan Harry Edmond, Foma presiden blong Torba i sekurum sit blong hem folem anofisl risalt. Long Torres konstituensi, Winston Elton i sikurim sit blong hem folem anofisol risalt blong 142 vot.

Graon mo Jastis Pati i sekurim wan sit long Torba provinsol kavman kaonsel long konstituensi blong Gaua- Merig, anofisol risalt i soem se Hosea Tari Wosobrig i sikurim wan sit long provinsol kaonsel folem anofisol risalt blong 518 vot.

Kaonting blong Torba provinsel eleksen bae i tekples long Luganville, Santo long ol dei we i kam.

 

 

 

(Visited 130 times, 1 visits today)

About The Author

You might be interested in