Ova VT 1.6billion blong Harold rikavari

Australia bae i kivim ova VT1.6 billion blong helpem rikavari prokram blong Saeklon Harold.

Acting Australian High Commissioner long Vanuatu, Clemency Oliphant, i saenem akrimen ia wetem Prime Minister, Bob Loughman long ofis blong Prime Minista long manis ia.

Ms Oliphant i talem se Australia i glad blong sapotem Vanuatu wetem vatu olsem blong impruvum laef blong ol pipol.

“Sam komuniti raon long Vanuatu oli fesem impak blong COVID-19 mo Saeklon Harold, “ Ms Oliphant i talem.

“Plante laef blong olgeta i had from oli no rikava mo rebuilt long tufala disasta.”

Prime Minista Loughman i kol blong mani ia i yus long stret wei mo pepes blong hem.

“I gud yumi lukaotem gud mani ia mo yusum blong helpem ol pipol we oli afek long saeklon Harold,” Prime Minista Loughman i talem.

“Sapos i kam blong bildim wan health centre o wan komuniti wota saplae, ples ia nao mani ia i sud ko long hem.

“Mi wantem talem tankiu long kavman blong Australia blong luksave nid mo kivim mani i kam blong sapotem ol pipol blong Vanuatu.”

Prime Minista Loughman i talem se rikavari strategi ia, bai hemi helpem ol scul, helt fasiliti, wota saplae mo sanitation fasiliti mo livlihood resilience long ol komuniti.

Acting Australian High commissioner emi aknolejem ol help weh i stap bitwin Vanuatu mo Australia blong helpem living blong ol pipol.