Ova VT1.8 billion -Disasta scheme

Ova long VT1.8 billion hemi aot long Vanuatu National Profident Fund system long Disasta Recovery Project Scheme sins tufala Saeklon long March.

Vanuatu National Provident Fund i rilisim tugeta 30% mo 50% disasta recovery package loan scheme.

General Manager blong Vanuatu National Provident Fund, Parmod Archary i toktok wetem VBTC Nius mo talem se 13,955 pipol oli aplae from 30% disasta loan mo i apdeitem total mani we i kam aot folem 30% ia.

“Peimen amaon kasem tete hemi ova long total yumi pem 13091 memba mo i kat 9000 pending aplikesen we i redi blong oli kolektem,”

“Total mani blong olgeta we oli tekem vatu vinis hemi VT1.2 billion.

Hemi kontinu blong talem se i kat 18,222 pipol oli aplae from 50% payaot loan.

“Total amaon blong vatu we yumi pem aot hemi VT Six Hundred and Eighty one Million.

Mr Archary hemi pointem aot tu total mani we i kam aot long Vanuatu National Provident Fund system folem 30% mo 50% scheme

“So VT1.8 billion i kamaot long system mo hemi gud long economi mo yumi expektem ol memba blong yusum wiseli mo bildim bak ol haos blong olgeta,” Mr Archary i talem.

Pakej loan ia bae hemi open yet mo bae i klos taem we kaontri i aot long State blong Emergency long Septemba.

by Patience Mawa.