Ova VT1 billion -Lenakel mo Litzlitz wharf projek

Ova VT1 billion long Projek ripea wok long Lenakel mo Litzlitz wharf.

Communication Ofisa blong Vanuatu Project Management Unit, Kierry Manassah i talem se projek ia i kam long en mo bae plante ship i save sevesem Malekula mo Tanna.

Asian Development Bank i fandem projek ia inkludum narafala wof we wok long olgeta bae i stat i no longtaem.

“Hemi wan projek we i kam anda long Vanuatu Inter-Island Shipping Support projek; Asian Development Bank i fandem, Projek hemia long Tanna hemi araon VT500 million mo Litzlitz hemi ova VT500 million from yumi kat wan savaging wok we yumi mas aotem tufala ship we i draon mo extend blong damej,” Mr Manassah i talem.

Mr Manassah i talem se bambae pipol i save lukim inkris namba blong ship we oli sevesem Tanna mo Malekula aelan.

“Tufala projek ia i bin kik off long en blong las yia(2021) mo i sud tekem abaot six manis blong komplitim be COVID i mekem dilei,” Mr Manassah i talem.

“Yumi kam nao blong kompletim ol wok ia, mo wik ia yumi travel i ko daon blong mekem final inspeksen. Yumi hapi long ol wok blong Fletcher from ol wharf i stap long gudfala kondisen. Mo samtaem neks wik pa yumi ofisiol handova blong hem.

“Nara wharf blong yumi long Litzlitz hemi sud en long June ia.”

Fletcher Construction kampani nao i winim tenda blong riperem tufala wof ia.