Ova VT100,000 blong ol Pipol wetem Disability

Pipol wetem Disability i raisem ova VT152,000 long wan Wilbaro Push long Freshwota, Efate long eli Octoba ia.

Jif Ken Hivo mo semtaem Presiden blong Komiti ia, hemi talem se bigfala tingting bihaen long wilbaro push ia i blong helpem araon 20 Pipol wetem disability taem i kam long ol had taem.

Hemi talem se komiti i kamap wetem tingting ia afta long wan wokshop we oli holem wetem ol Pipol Wetem Disability.

“Pepes blong wokbaut ya hemi blong raisem mani blong helpem ol pipol ia long ol nid blong olgeta, espeseli long ol taem blong disasta, ” Jif Hivo i talem.

“Mo i no disasta nomo. Sipos i kam kasem wan taim we wan i lusum laef blong hem, o wan narafala samting olsem haus i bon, komiti i save step in.”

Hemi talem se i gud komiti i soem komitmen blong hem fastaem bifo Vanuatu Society for People with Disability (VSPD) hemi kam blong help.

Jif Hivo i talem se pipol long komuniti blong Freswota i askem hem blong tekem disisen ya from ol komiti we oli bin setap  bifo, oli no putum wan fund(mani) we i stap blong lukluk long ol nid blong ol pipol ia.

Hemi stap enkarejem ol narafala eria blong oli tekem ap tinktink ia tu blong rij aot long olgeta pipol wetem disabiliti mo eim hae oltaem blong sevesem nid blong olgeta.

“Long en blong dei, God i krietem olgeta semak we God i krietem umi. Hemia nomo se oli diseibel, mo oli no save kamaot. Be yumi save helpem olgeta blong oli save gat akses long evri samting we yumi gat akses long hem,” Jif Hivo i talem.

Hemi talem tankiu tu long ol pipol we oli help givim vatu long wilbaro push ia.

Wan wetem spesel nid tu lo taim ya, Dick Pita, hemi talem aot hat blong hem from aksen we komiti i tekem blong raisem mani blo helpem ol nid blo olgeta.

“Hemi wan blessing long mifala wetem disability blong luk komiti i raisem wan mani olsem blong helpem mifala wetem ol nid blong mifala,” Pita i talem.

Wilbaro push raon long eria blong Stade mo Freswota ia i blong helpem ol Pipol Wetem disability we oli liv long tufala eria ia.

By trainee journalist, Tiffany Baldwin.

 

(Visited 103 times, 1 visits today)

About The Author

You might be interested in