Ovasi flaet bae i stat bakegen -July

Efektiv long July 1, ol foreign air operata bae oli statem bak ol flaet i kam long Vanuatu.

Minista blong Infrastructure mo Public Utilities, Jay Ngwele, i anaonsem long Fes Ordinary Session blong Palemen long Tuesday aftanun.

“Mi wandem adem nomo se 1st blong July we bae ol boda i open, Director blong Civil Aviation Authority hemi karem sam sabmisen long sam foreign air operata blong oli resume reschedule flaet blong mekem seves i kam long Vanuatu we hemia i kat Fiji airways, Fiji Link, Aircalin, Virgin Australia, Air Niugini, Solomon Airlines, mo sam oli even wantem mekem direk flaet i kam long Santo, so hemia hemi gud nius blong haos tete,” Minista Ngwele i talem.

“July priperesen i ko hed mo yes bae yumi kat ol flaet i kam in.”

Be Torres Memba blong Palemen mo semtaem foma Minista blong Infrastructure mo Public Utilities, Christophe Emelee, i kwestenem sapos Air Vanuatu i kat wan IOSA certifikasen we i steitem sefti blong plen.

“Mi wantem askem nomo se Air Vanuatu i kat wan IOSA certifikasen i stap o, from mi andastanem se las wan we oli bin mekem hemi long 2019 mo hemi en long 2021, so sapos i nokat naoia from 2021 -2022, regulator blong yumi i mekem wanem?

“Mo sapos i kat, bae hemi save provaedem long Palemen, from plante long yumi ia, yumi stap ko insaed long ol plen ia, IOSA hemi lukluk long sefti blong ol plen, yumi mas mekem sua se yumi folem evri standard, sapos i nogat bae i afektem isurens, landing long Australia mo New Zealand, Codeshares blong yumi so wanem poin blong openem boda we yumi no redi?

“Kwesten ia mi askem blong helpem yumi tu long ol domestik plen we oli stap seves long ol aelan ia blong oli sef. Yumi andastanem se wan twin otter hemi daon naoia mo hemi mas ko long wan bigfala ripea.

“Konsen blong mi hemi blong yumi redi nomo mo no wok long las minit from long 2015 ol plen blong yumi i bin stap aot blong tri manis from IOSA certification.”

Minista Ngwele i talem se audit bae i stat long August.

“Blong infomesen blong haos, audit bae hemi stat long fes blong August mo mi biliv se CEO blong Air Vanuatu wetem management blong tim oli stil konfiden se bae IOSA certificate hemi stil laef,” Minista Ngwele i talem.

“Bae mi provaedem wan copi long ol Memba blong Palemen long wik ia, mo mi biliv se Air Vanuatu hemi klaem long wan bigfala strakol, financiali hemi fesem problem be sloslo bae yumi kamaot long problem ia.”

 

 

(Visited 1217 times, 1 visits today)

About The Author

You might be interested in