Ovasi sailing yacht i faen

Sailing yacht Bolt we i bin kasem solwota blong Penama Provins long manis ia i faen VT 10 million long wik ia.

Director blong Customs, Harold Tarosa, i talem se faen ia i folem wan instrument we director blong National Disaster Management, Abraham Nasak, i kivim from kaontri i stap long State blong Emergency blong COVID-19 mo ship ia i bin kam insaed long eria blong kaontri mbe ol othoriti i nosave o oli no apruvum.

Faen ia Customs Dipatmen, Ofis blong Maritime Regulator, Immigration mo National Disaster Management Ofis i bin kivim long hem.

Mr Tarosa i se i tabu blong wan ovasi ship o plan i kam insaed long kaontri witaot apruvul blong ol othoriti.

Hemi talem se ol loa blong boda i stap mo eni wan i no komplae bae hemi panis.

“Long keis blong yacht ia, hemi kat problem wetem pam o enjin blong yacht i stap ova hit mbe hemi no bin letem mifala i save,” Mr Tarosa i talem.

“Mo hemia nao ol pipol blong penama i lukim yacht ia i float kolosap nomo long shoa nomo long eria blong olgeta mo oli ripotem i kam.

“Laki se hemi no ko shoa mo anchor mbe hemi stap float nomo.”

Mr Tarosa i talem se oli bin holem taet ol passport blong ol krew mo pasenja blong yacht ia taem oli stap mekem investikesen.

“Mbe afta we mifala i imposem faen long ship, mifala i kivim bak evri dokumen ia,” hemi talem.

“I bin wanm arial seveilens we Kavman i kontaktem mo RVS Turoroa long Santo i go eskotem yacht ia long saot Ambae i kam long Efate blong kontaktem investikesen.

“I tru hemi brekem loa blong kaontri mbe hemi no minim, hemi fesem problem i mekem se hemi kam kolosap long ol aelan.”

Sailing yot Bolt hemi blong wan richman mo hemi stap ko long New Zealand.

Mr Tarosa i talem se ol pipol long Penama oli lukim ol laet andaneath mo antap long yacht from hemi blong wan richman.

VBTC Nius i kasem toksave se ol scientist nomo oli stap insaed long yacht ia mo yacht i bin leko Papua New Guinea blong ko long New Zealand.

Yacht ia i leko Vanuatu eli long wik ia.