Paama i kol blong rispektem fish device

Paama i kol blong ol ship i rispektem ol Fish Device we i stap long solwota.

Eria Administrata, Cyrus Willie, i talem se i kat plante experience we Fisheries Dipatmen i bin putum ol Fish Aggregate Device blong ol fisherman i huk long hem mbe ol crew blong ol ship we oli stap seves long solwota i stap huk long hem.

Mr Willie i talem se naoia Fisheries Dipatmen i diploem wan niu Fish Aggregate Device bitwin Saot East Ambrym mo Paama long eli Decemba ia.

“Mi askem evri ship we oli stap seves i ko long Not blong Vanuatu se taem oli leko Epi long naet o dei, oli mas kip aot long eria blong hukum fish ia,”Mr Willie i talem.

“Eria ia hemi blong ol lokol fisherman i huk long hem, mo device ia i stap blong atrakem ol bigfala fish.

“Hemi wan niu fish device we fisheries i putum blong sapotem ol fisherman blong salem kwaliti fish mo winim vatu blong sapotem famili.”

Mr Willie i talem se Malampa Fisheries Ofisa i wok wetem Maritime Regulator blong pasem aot mesej ia i ko long ol ship.

Long ol manis ia pas, Fisheries Dipatmen i bin stap trenem ol lokol fisherman long ol niu fishing skil.

Long June yia ia, Fisheries Dipatmen long Santo i bin ranem wan training longsaed blong fishing long olgeta fisherman ia blong impruvum fishing skills blong olgeta.
Clay Sara, Acting Principal Fisheries Development Officer long not, i talem se hem ia hem i pat blong longterm rikavarai plan blong dipatmen afta long Cyclone Harold.

Mr Sara i talem se long August ol fisherman ia i ko tru long Fishing Aggregate Device fishing monitoring mo evaluation blong device ia.

Long semak manis ia, ova 25 lisens fisherman i stap long Pele aelan blong ko tru long semak trening

Dimitri Kelala, Shefa Fisheries Developmen Ofisa i talem long VBTC Nius se Fishing Agregating device hemi wan fishing technology we oli putum long solwota mo afta long wan manis oli ko tijim ol fisherman hao blong huk long hem.

Hemi talem se tails hem wan nara pat blong trening we oli wok wetem komuniti blong rikodem data blong fish sins 2017.

Mr Kelala i talem se long 2017 i kam i gat nomo ol komuniti tails monitor mbe long June hemi festaem oli wantem extendm program ya long ol licenced fisherman oli yusum blong nomo ko luk ol komuniti monita blong rikodem data.

VBTC Nius i kasem toksave se Fishing Aggregate Device hemi blong enkarejem ol fisherman i ko huk long dip solwota mbe no long shoa we i kosem ova harvest.

Fish Aggregating Device hem i wan object we oli putum long solwora blong atraktem ol fish blong fisherman i save salem kwaliti fish we i stret size.

(Visited 308 times, 1 visits today)

About The Author

You might be interested in