Pacific Star Limited onli permanent residency agent

Wan oda i saen tete blong kanselem ol kontrak we i stap wetem ol Permanent Residency agent long Vanuatu mo apruvum wan nomo.

Niu Minista blong Internal Affairs, Claude Christophe Emelee hemi saenem oda ia blong kanselem ol agrimen bitwin ol Kavman mo ol agent olsem PRG Consulting Limited mo apointem wan nomo we hemi Pacific Stars Limited.

Minista Emelee i talem se agent ia bae i lukluk bak long program mo inkrisim revenue koleksen.

Director blong Immigration, Jeffery Markson i talem se Pacific Stars Limited hemi onli best agent blong Permanent Residency.

“Hao Pacific Star hemi bin set ap, marketing mo namba blong client we hemi karem i kam in hemi kam neks long PRG Consulting Limited; Wan nara samting hemi from oli stap wetem yumi long pleisa. So hemia nao minista i bin askem tinktink blong mifala, mifala i talem se yu kat ol opsen ia nomo we i stap,

“So  Minista i disaed se bae yumi lukluk long Pacific Star blong wan taem blong 1 yia,” Mr Markson i talemaot.

Oda i talem tu se long six manis, mbai Dipatmen blong Immigration i sitdaon wetem Minista blong lukluk bak long prokram mo lukluk blong impruvum.

“Long nekis six manis sapos yumi save kamap wetem wan program we minista hemi glad long hem ten hemi minim se yumi aotem oda ia bakegen mo kobak long niu wan we bae i kam tru long recommendation we i stap.”

Mr Markson i talem se kanselesen ia hemi blong mekem se kontrol i stap oltaem long ol bigfala program blong pulum in mani long kaontri.

“Mi disaed sapos dipatmen i no konfusum hem blong stap karem ol aplikesen long ol difren agent so yumi alaoem wan agent blong hemi stap karem in revenu ia wael yumi, yumi redesign,” Mr Markson i talemaot.

“Amaon blong revenu we yumi stap karem in long PR ating bae mi save talem olsem se hemi ova VT500 million long wan yia so hemia nao yumi alaoem hemia blong kam in wael yumi redesignem gud bae amaon ia i dabol.”

Pacific Stars Limited hemi stap olsem onli agent we igat raet ia mo oda i givim hem wan yia blong i wok wetem Dipatmen blong Immigation.

By Agnes Herbert.

(Visited 850 times, 1 visits today)

About The Author

You might be interested in