Palamen i kat fo standing committee

Palamen i katem daon namba blong ol Standing Committee long Palamen ia.

Clerk blong Palamen, Raymond Manuake, i talem se long niufala jenis blong standing oda, i kat nomo fo Standing Committee long 12th legislaja ia.

Hemi talem se, “Long eleven legislaja we i pas, yumi bin kat eight standing komiti mo ofis blong secretariat blong Palamen i faenem i had tumas blong mekem wok folem risos we mifala i kat blong save ranem eight komiti.”

“Wetem reverse standing oda, mifala i katem daon long fo wetem ol wok blong olgeta blong mifala i save manajem mo oli save wok gud mo ripot i kambak long Palamen,” Mr Manuake i talem.

“Olgeta Standing Committee ia, i kat komiti blong public accounts, economic mo foren polisi, social affairs, mo institutional mo constitutional affairs.

“Palamen i elektem ol memba mo jeaman blong ol different Standing Committe blong hem long wik ia.”

Jeaman blong Standing Committe blong Public Accounts, hemi Memba blong Palamen blong Luganville, Matai Seremaiah.

Jeaman blong Standing Committe blong Economic mo Foren Policy hemi Memba blong Palamen, Wesly Rasu blong Malo Constituency.

Joshua Pikioune, hemi jeaman blong Standing Committe blong Social Affairs.

John Still Tari hemi jeaman blong Standing Committe blong Institutional mo Constitutional Affairs.

Matai Seremiah i talem long VBTC se hemi luk fowod blong wok wetem Palamen Standing Committee.

“Responsibiliti blong [Standing Committe blong] Public Accounts hemi blong enquire long expense blong kavman olsem ol kavman institution o eni statuatory bodi blong kavman,” hemi talem.

“Mo hemi wan impoten wok we komiti bae i pleim long Palamen mo mi olsem jeaman blong komiti bae mi mekem best blong mi wetem tim blong helpem kavman tru long wok blong public accounts, blong dil wetem eni isu .

“Mo sapos pablic i luk se i mas kat wok long eni eria we oli wantem, komiti blong mi bae i mekem wok.”

The Standing Committe blong Public Accounts bae oli lukluk long ol wok olgeta institution blong Gavman, mekem pablik odit, lukluk long ol tax mo ol financial ripot.

Committee blong Economic mo Foren Policy, bae oli lukluk long ol area olsem trade, toursim, economic, foren polisi, mo ol economic activiti.

Social Affairs Committee bae oli adresem ol eria oslem health, education, justice, climate change, yut, graon, mo bisnis developmen.

Mo Standing Committe blong Institutional mo Constitutional Affairs bae hemi lukluk long ol institutions blong Kavman mo ol loa blong kaontri.

 

 

(Visited 44 times, 1 visits today)

You might be interested in