Palemen Fes Ordinary session i open

Fes Ordinary Session blong 13 Legislature blong Palemen i open tete moning.

Presiden blong Republic blong Vanuatu, His Excellency Nikenike Vurobaravu i openem Palemen session ia tete taem hemi reminder ol Memba blong Palemen long wok blong olgeta we Constitution o mama loa i givim.

Long japta 4 blong mama loa we His Excellency i rifea long Atikol 16 (1) i talem se Palemen i save mekem ol loa blong pis, oda mo gud kavman blong Vanuatu.

His Excellency Nikenike Vurobaravu i talem se ol pipol i votem wan Memba blong Palemen mo fo yia term i blong mekem disisen long wanem nid blong mekem sua se social mo economic mo 2030 plan oli no fogetem.

Hemi askem ol Memba blong Palemen blong lukluk long Papa God olsem Creator blong wisdom wetem positive fasin.

“Vanuatu i kat wan long rikod blong pisful co-existens sins afta long Independens; taem ol criminal aktiviti i stap kam antap, social instabiliti i stat insaed mo hemi impoten blong yumi meintenem capasiti blong mekem sua se i kat stable growth wetem social mo economic developmen, ” His Excellency Vurobaravu i talem.

“Yumi mas kat ol stret environmental management, capasiti mo capabiliti blong patisipeit wetem ol patna blong yumi long ol post disasta aktiviti.”

His Excellency Vurobaravu i talem se 12 legislature i bin kasem plante jalenj olsem social mo economic crisis, natural disasta, impak blong Climate Change, sik blong COVID, komuniti unrest, domestik violens mo instabiliti mo hemia i putum i ko long test Palementari wetem democratic principle.

“Mbe nomata long jalenj ia hemi soem resilient spirit blong yumi mo i mekem wan bigfala ajivmen long social mo economic developmen,” Hemi talem.

His Excellency,  askem ol Memba blong Palemen blong lukluk long Papa God olsem Creator blong wisdom wetem positiv fasin.

Twenty tu bill blong diskasem long Palemen sitting ia.

I kat Bill blong National Security (Amendment) Act No. blong 2023, Bill blong Statute Law (Miscellaneous Provisions) Act No. blong 2023, Bill blong Revision & Consolidation blong Laws(Repeal) Act No. blong 2023, Bill blong Leadership Code (Amendment) Act No. blong 2023, Bill blong Explosives Act No. blong 2023, Bill blong Adoption Act No. blong 2023, Bill blong Data Protection mo Privacy Act No blong 2023, Bill blong Broadcasting mo Television (Amendment) Act No .blong 2023, Bill blong Business License(Amendment) Act No. blong 2023, Bill blong Quarry(Amendment) Act No. blong 2023, Bill blong Disaster Recovery mo Resilience Act No. blong 2023, Bill blong Digital Safety Authority Act No. blong 2023, Bill blong Electoral Act No. blong 2023, Bill blong Referendum(Amendment) Act No. blong 2023, Bill blong Harmful Digital Communication Act No. blong 2023, Bill blong Agriculture(Amendment) Act No. blong 2023, Bill blong Municipalities (Amendment) Act No. blong 2023, Bill blong Decentralization (Amendment) Act No. blong 2023, Bill blong Political Party Regulation Act No. blong 2023, Bill blong Charitable Associations(Incorporations) (Amendment) Act No. blong 2023, Bill blong Police(Amendment) Act No. blong 2023 wetem Bill blong Vanuatu Defence Force Act No blong 2023.

Palemen sitting tete i muv i ko long Tuesday neks wik blong givim taem long ol Memba blong Palemen blong ridim mo save gud bill.