Palemen i adjourn folem constitutional kes

Speaker blong Palemen i muvum Friday Palemen sitting i ko long wik ia folem Constitutional kes akensem hem.

Honoroble Gracia Shadrack, i tekem disisen ia from i kes we Kavman i faelem akensem hem mo court bae i lukluk long hem long Monday tete.

Mr Shadrack i talem se hemi rul anda long standing oda blong Palemen blong adjournem sitting long Friday i ko long Wednesday wik ia.

“I gat wan constitutional kes we kavman i putum mo court i mas tekem wan disisen long hem,” Mr Shadrack i talem.

Lida blong Kavman Bisnis, Honoroble Anatole Hymak, i aknolejem disisen blong Speaker blong Palemen, Mr Shadrack, blong muvum sitting mo oli akseptem.

Mbe Kavman saed i wantem tokbaot ol bill taem Palemen sitting i ko hed long wik ia bakeken.

Lida blong Opposition, Honoroble Ralph Regenvanu, i talem se hemi propa fasen blong muvum sitting from court i mas sikim legol tinktink long status blong 19 Memba blong Palemen ia.

“I nogud Palemen i ko hed mbe ol disisen blong hem i no folem loa,” Mr Regenvanu i talem.

Clerk blong Palemen, Raymond Manuake, i talem long VBTC Nius se hemi no duti blong clerk o sergeant blong fosfuli rimovum ol 19 Member blong Palemen long Palemen jemba lastaem taem Mr Shadrack i bin talem se ol seat blong 19 Memba blong Palemen i vacate.

Mr Manuake i mekem i klia se tufala i blong asistim olgeta nomo taem oli stanap.

“Mifala i bin act long wanem speaker, Mr Shadrack i talem, mifala i stat wetem fes nem we hemi ridim aot mbe circumstances i mekem se oli no save muv aot mo oli staon nomo,” Mr Manuake i talem.

Francois Chani Tabisal, Private secretary blong Speaker blong Palemen, i komentem aksen blong clerk mo sergeant se tufala bin mekem gudfala wok.

“Hao tufala i behave mo soem asisitem blong Memba blong Palemen i muv aot,” Mr Tabisal i talem.

“Palemen i mas meintenem ingreti we hemi deservem.

Suprim kot blong Vanuatu bambae i sidaon long tete Monday 10am blong preside ova long constitutional petisen blong kavman.

Jastis Oliver Saksak nao bambae i examinem konstitusonal aplikesen ia.

Ol Memba ia i kat Praem Minista mo wan Memba blong Palemen blong Tanna, Bob Loughman, Deputi Praem Minista mo wan Memba blong Palemen blong Port Vila constituency, Alatoi Ishmael Kalsakau, Samson Samsen, wan Memba blong Palemen blong Santo Rural, Edward Nalyal Molou, Memba blong Palemen blong Tafea Outer Islands, Nako Ianatom Natuman, wan Memba blong Palemen blong Tanna, Leonard Joshua Pikioune, wan Memba blong Palemen blong Santo, Mark Melsul, wan Memba blong Palemen blong Pentecost, Edmond Julun, wan Memba blong Palamen blong Malekula, Xavier Emanuel Harry, wan Memba blong Palemen blong Tanna, Harry Anthony, wan Memba blong Palemen blong Port Vila, Jay Ngwele, wan Memba blong Palemen blong Ambae, Simeon Seule, Memba blong Palemen blong Epi, James Bule, wan Memba blong Palemen blong Ambae, Willie Pakoa Setearoto, Memba blong Palemen blong Sherpherds Outer aelan, Mark Athy, Memba blong Palemen blong Luganville, Willie Daniel, Memba blong Palemen blong Tongoa, Silas Bule, wan Memba blong Palemen blong Pentecost, Bruno Tau Leingkone, wan Memba blong Palemen blong Ambrym, Johnny Koanapo Raso, wan Memba blong Tanna.