Parents i kwestenem dilei blong alaowens

Ol parents blong Vanuatu Kavman sponsor studen ovasi i kwestenem dilei blong alaowens.

Joycelyn Garaelulu i talem se hemi wan longtaem isu mo plante parents blong ol skul pikinini ia long Fiji mo Samoa oli mas sendem mani evri wik i ko long ol pikininin blong olgeta from dilei blong alaowens.

Hemi talem se plante parents oli sendem mani long eli yia ia blong 3 o 4 taem nao.

“Longtaem isu ia, kavman i no save stretem mo ol studen mo ol famIli blong olgeta i nomo akseptem blong i kontinu,” Mrs Garaelulu i talem.

“I no fea nating taem ol studen we oli gat nara sponsa oli karem mani long stret taem mbe Vanuatu kavman sponsa studen mani blong olgeta i dilei.

“Taem mani i dilei, ol studen oli wari from kakae, paymen blong ren from oli stap long wan difren kaontri.

“Mi olsem wan parent mi konsen from mi nosave se pikinini blong mi i stap ovasi i stap kakae o nokat.

“Mi kat kwesten tu se hemi slip gud long naet o nokat.”

Wan nara parent, Kalkot Kaltabang, i talem se kavman i mas lukluk serious long dilei blong ol studen alaowens ia.

“Ol pikinini ia we oli ko skul ovasi ia, olgeta nao oli ol futja blong Vanuatu,” Mr Kaltabang i talem.

“Yumi mas lukluk long olgeta from hemi impoten, taem oli kambak wetem ol save, oli save helpem divelopmen blong kaontri ia.”

Long wik ia, Ministry blong Education mo Training i bin putum aot long fesbuk pej blong olgeta se ol Vanuatu Kavman sponsor studen ovasi bae oli kasem alaowens blong olgeta long wik ia.

Long post ia i statem se ol hemia i depen long long hao bank i prosesem mo spidim ap wok blong mani ia.

Ministry blong Education mo Training i statem se alaowens ia i kavremap period stat long 1 February kasem 30 April 2021.

Education ministry i talem se alaowens ia hemi blong tri manis mo oli enkarejem ol studen blong manejem gud we i minim se oli no ko long club mo drink blong spend.

Ministry blong Education mo Training i talem sori long dilei blong ol alaowens ia long ol studen mo ol parents.

Mbe sam Vanuatu Kavman sponsor studen long Fiji, i talem se oli no kasem yet ol alaowens blong olgeta long wik ia.

Director blong Tertiary Education we i lukaotem scholarship long Ministry blong Education mo Training, Anne- Rose Tjiobang, i kleim se fulap long ol Ni-Vanuatu studen ia we oli stap tekem scholarship, oli no folem stret proses.

Hemi talem se evri yia oli mekem seleksen folem bajet mbe i gat samfala skul pikinini ia oli neva aplae mbe nem i kam tru.

“Resen ia nao i kontribut bikwan long dilei blong alaoens blong ol studen ovasi,” Mrs Tjiobang i talem.

“Sam list blong ol studen we i kam i no stret long master list mo hemia nao i pulum taem.

“Mo mi olsem director, mi mas mekem sua se mi spendem vatu folem badget we i stap from samtaem i kat tu duplicate, samtaem ol nem we i kam i no folem proses nomo.

“Mo yumi mas dil wetem from yumi nosave se ol nem ia i kam olsem wanem.”

Robson Tigona, wan tija blong Laucala Campas long University blong South Pacific long Fiji, i talem se hemi impoten blong kavman i luksave stadi blong ol studen ia mo sendem mani blong olgeta i kam long taem.

“Long wei ia bae oli no stap wari mbe fokas long stadi blong olgeta,” Mr Tigona i talem.

VBTC Nius i kasem toksave long Dipatmen blong Finance se oli nomo handelem proses blong alaoens blong ol studen.

Mo Ministry blong Education mo Training i tekem ova wok ia long yia 2020.

Minister blong Education mo Training, Honoroble Seule Simeon, i bin tok akensem fasen blong dilei blong alaowens blong ol Vanuatu Kavman sponsor studen se i mas stop long Palamen sitting long 2020.

“Olsem Minister risponsibol long education, mi mas stap blong luk se scholarship ofis i karem aot wok blong hem long taem long wan fasen we i stret,” Minister Simeon i talem.

“Point nao se taem pikinini i krae long wan foreign kaontri, hu bae i lukluk long hem, system ia i mas stop.

Wan nara konsen parent we i no wantem talem nem blong hem, i talem se afta long strong toktok blong minister Simeon, i nokat wan aksen i hapen kasem tete.

“Yumi ol lida i mas stop blong toktok bigwan mbe mekem aksen from long en blong dei, ol pikinini i kam victim,” hemi talem.

“Ol pikinini ia oli glad blong go stadi mo taem dilei blong ol alaowens olsem, i mekem oli fil daon.”

VBTC Nius i kasem toksave se las alaowens blong ol Vanuatu Kavman sponsor studen hemi long December 2020.