Passport database system i mas apgrade-OGCIO

Ofis blong Government Chief Information Officer i kol blong agradem passpot database system.

Deputy Chief Infomesen Ofisa long Ofis blong Government Chief Information Officer , John Jack i talem long VBTC Nius long eli wik ia se kavman i mekem bigfala mani long passport mo hemi sud invest moa long wan propa system.

Mr Jack i talem se immigration i stap yusum tri komputa wetem system blong windows XP we hemi outdeit from oli yus big quantiti blong foto mo data.

“Database we immigration i yusum oli ranem passport system we hemi akses database hemi outgrowem capasiti blong hem mo i nosave yus long wan bigfala system,” Mr Jack i talem.

“Mo tu microsoft system blong passport oli konektem wetem wan scana we hemi nosave scanem file wan wan afta jes ko long microsoft be i mas scan direk i ko long system. Mo hemia i mekem i mo slo from taem yu scanem ol pija file hemia ol bigfala file ia. So jes imaginem sapos yu stap scanem ol file ia long Vila, afta wan i stap long Tanna o Santo mo traem blong aksesem semak rikod ia bae system i nosave wok gud nomo.

“Hemi rikwarem Central Tender bod, bae hemi ova long treshold blong kavman be hemi best wei.”

Immigration Director, Jeffrey Markson i bin talemaot long wan press rilis long July ia se passport masin i wok gud mo hemi blemem kavman netwok.

“Mifala i wantem mekem i klia se ol passport printing masin i wok oraet nomo mo i kat enaf passport buk i stap long stock,” Mr Markson i talem.

“Isu hemi netwok blong kavman we i ranem evri system.”

Be Mr Jack i talem se isu ia i no netwok problem.

“So problem we mifala i faenem long system blong passport hemi no problem blong netwok o Windows XP be hemi system nomo from i design blong opereit long wan low capasiti.

Hemi talem se problem blong system ia i bin hapen longtaem vinis bifo oli faenem paspot database system i outdeit.

Mr Jack i talem se kampani we i setem ap database system blong passport i stap long New Zealand mo hemi lokem.

“Best wei blong mekem hemi blong kobak long kampani ia from hemi kat copyright ova long system, toktok wetem hem mo hemi save givim akses blong yumi wok lem mo tekem aot ol data blong fulap pipol i save yusum system ia wantaem mo developem long wan wei we i save alao long growth blong data mo yusa akses tu,” Mr Jack i talem.

“Contract wetem ovasi kampani ia i laef kasem tete.”

Ofis blong Government Chief Information Officer i talem se hemi stap traem blong meintenem wan standard operating system.

“Mo ol system we i olfala mo i nomo sapot long maket, yumi askem blong tekem aot mo yusum lates wan we i nosave kam wan security risk long netwok,”Mr Jack i talemaot.

Long wik ia, VBTC Nius i luk plante lokol i fulum ap ol form blong mekem passport be immigration i advise blong oli wet fastaem from system i daon.

Plante oli talem se prioriti blong kat wan passport i ko long ol seasonal wokman we oli pat long Labour Mobility.

 

 

(Visited 668 times, 1 visits today)

About The Author

You might be interested in