Vanuatu Passport form long tri categori

Oda blong ol niu passport form bae i saen long wik ia mo divide long tri categori.

Folem dilei long shipmen blong ol Passport Booklet, Vanuatu Immigration Services i kam ap long passport form blong Citizenship through the Investment Program, Vanuatu Citizens mo Lost/ Misplace mo Expire Passports.

Director blong Vanuatu Immigration Services, Jeffrey Markson i talem se naoia pipol bae i aplae from passport folem tri categori ia.

“Resen from wanem yumi kat ol tri difren form ia hemi from ol form ia oli kat ol difren rikwamen we bae pipol i mas atanjem; Olsem yumi save long Citizenship program olgeta i kat plante difren dokumen, “Mr Markson i talem.

“Yumi ol nomol citizen, olgeta we oli stap ko long Labour Mobility, yumi traem blong kontrolem ol passpot anda long program ia. Yumi wantem kodinatem long wan wei we bambae taem man i tekem passport be hemi nomo ko holem taet be hemi mas travel. So mifala i toktok wetem ol agent wetem Labour mo tru long diskasen ia nao mifala i kamap wetem form ia.

“Nambatri we hemi Lost mo Misplace ia, mifala i kam blong luk se nomata long ol jalenj blong dilei blong passport, be once yumi printim passport blong wan man hemi no kea, i kambak nomo long neks dei i talem se hemi jam long bus i mestem o i jam long bus i mestem i wetwet mo i kam i pem nara wan. Wael yumi save se i tekem plante manis blong passport i kam be pipol i nosave lukaotem passport. So bae mifala i wok blong putum wan jaj fi we i hae lelbet blong mekem nomo se pipol i luksave value blong passport mo tekem risponsibiliti blong lukaotem. Hemia we i expae yes bae i ko tru long proses blong wan niu wan.”

Mr Markson i talem tu se oli awea se plante lokol i nokat ol gudfala haos blong kipim gud ol passport booklet.

“Oli no stap long wan ples nomo, oli muv araon long ol haos, so mifala i stap tinktink blong kat sam passport safety poket blong save kivim aot wetem ol passport blong helpem ol citizen,” Mr Markson i talem.

8000 niu passport booklet i stap long Vanuatu.

Mr Markson i talem se ol passport booklet ia i kam long wan extra flaet wetem ol cargo mo hemi dilei blong shipmen we i hapen raon wol.

Vanuatu i expektem 30,000 niu passport booklet blong kam yet.

 

(Visited 627 times, 1 visits today)

About The Author

You might be interested in