Passport print

Ova 1000 passport blong ol pipol we oli aplae long October-Novemba 2022 i print.

Director blong Immigration mo Passport Services, Jeffrey Markson i talem long VBTC Nius tete aftanun se ol passport aplikesen blong Novemba, December las yia mo January ia bae i print long en blong manis ia.

Mr Markson i talem se oli risosem fo niu ofisa. Mo i kat sam ofisa nomo insaed long dipatmen blong help long seves blong passport.

“Olgeta we oli bin aplae from passport long tufala manis ia mbe oli nogat nem long list, oli mas kambak long ofis from oli kat ol isu wetem ol aplikesen; Ating foto i no stret,” Mr Markson i talem.

“System we yumi stap yusum naoia hemi slo so yumi no wantem presa long hem. So olgeta pipol long Tanna o Santo o wan nara aelan oli mas pas long branch blong ofis long eria blong olgeta mo putum ol aplikesen blong olgeta. Ofisa long Santo ia bae i tekem ol aplikesen ia i kam kasem vila mo printem.

“Dimand blong passport i hae naoia from plante ol studen tu mo olgeta we ol travel blong wok.”

I kat komplen long fesbuk tete se from wanem Immigration i nosave faenem wan bigfala ples blong ol man i save ko pikim ap ol passport.

Ol man i bin fasfas nomo long ofis ia.

Mr Markson i rispon mo talem se oli wok wetem best risos we oli kat.

“Yumi stap traem blong fixim gud front ofis blong save tekem wan ofisa blong website mo fesbuk blong hemi stap givim aot infomesen long fesbuk,” Mr Markson i talem.

“Mi askem pablik blong rispektem ol mama we oli stap long front desk ofis from oltaem oli karem ol hard toktok.

“Mifala i wok wetem Ministry blong Internal Affairs long corporate seves blong kasem help long human risos mo funding blong yumi save hirem wan spes we moa bigwan. Hemia blong sepereitem seves blong passport mo visa.”

Mr Markson i talem se Vanuatu i stil nidim niu software blong prosesem passport.

Hemi talem se tender blong niu software i no ko aot yet from International Organization blong Migration nao i dil wetem. Mbe naoia oli stap long leave yet.

Naoia Mr Markson i talem se i kat ova 5,000 buklet blong passport long stock. Mo bae 27,000 buklet i kam yet long 2023 ia.

“Passport buklet i stap nomo,” Mr Markson i talem.