Pentecost bae i kat wan faktri blong kava

Drim blong ol pipol long Central Pentecost blong kat wan faktri blong kava i kam tru taem oli leiem daon fondesen ston blong bilding ia long manis ia.

Media Ofisa long Ministry blong Industry, Trade mo Ni-Vanuatu Business, Jean Baptiste Calo, i talem se hae jif blong Central Pentecost, Jif Samuel Lala mo jif blong Central Pentecost tu, Jif Philip Tabimasmas, i joenem han wetem Minista blong Industry, Trade mo Ni-Vanuatu, Honoroble James Bule, blong leiem daon wan ston blong bilding blong faktri blong kava long Lesseh vilij klosap long Bwatnapni.

Hemi talem se aelan blong Pentecost i produsum plante kava mo hemia hemi tinktink blong bildim wan faktri blong kava long aelan ia.

Lida blong Jej, Fr Godrington Bule, i talem se pipol i glad long tintktink blong kat wan kava faktri.

“Bambae yumi leiem wan mat blong divelopmen we Kavman i wantem putum i kam from bae i nomo gat disput o ol rao rao bakeken long hem,” Mr Bule i talem.

“Evriwan bae i hapi blong wok wan blong mekem sua se yumi benefit long divelopmen we kavman blong yumi i kivim.

“Kastom hemi fondesen blong rispek long wokabaot mo toktok blong divelopmen.”

Ol jif blong Central Pentecost i talem se ol smol han blong red mat ia hemi ol pipol we oli bin krae 40 yia blong gat wan faktri blong kava long aelan ia.

Principal blong Bwatnapni skul long Central Pentecost, i talem se ol jif blong Pentecost oli givim wan kastom nem long minista Bule we hemi Lepsalga.

“Lepsalga i minim se hem nao i karem drim ia i kam tru,” hemi talem.

“Hemi wan drim we longtaem yumi trae had from gogo mbe tru long Honoroble Minista ia nao, hemi mekem i kam tru.

“Mo ol pipol bae oli save enjoyem mo benefit long hem.

Fr Bule i talem se oli salutum kavman blong tete.

“ Yes, yumi salutum Honoroble Minista mo Prime Minister from wok we yufala i save krietem long aelan blong yumi long Penticost we bae i sapotem plante lokol pipol,” hemi talem.

“Hemia i minim se plande kost we ol fama i mitim tete bambae i nokat from bae oli salem kava blong olgeta i ko direk long faktri.”

Mr Calo i talem se mani blong fandem kava faktri ia bae i kam tru long kavman.

(Visited 460 times, 1 visits today)

About The Author

You might be interested in