Pentecost Jif; Wari long kaljarol heritej

Divelopmen blong kolta rod long Central Pentecost i mekem bigfala wari long ol jif blong lusum kaljorol cave blong olgeta we i holem taet kastom fasin blong weavem red mat.

Wan long ol hae rank Jif blong Pentecost long Vanmelang, Danmanok Philip, i talem se hemi no hapi from mak blong kolta rod long Pentecost bae i pas tru long tabu-kev we ol kastom disaen blong red-mat long Pentecost oli droem bifo i stap insaed long cave ia.

Jif Philip i talem se ol jif blong Pentecost i wari bigwan from Central Pentecost nao i holem taet heart blong aelan ia long saed blong kalja mo kastom blong red mat.

“Sapos cave ia i aot, bae i nomo kat ol mat mo long futja bae kastom i lus,”Jif Philip i talem.

“Mi mas tok strong from identiti blong ol man Pentecost ia.”

Vanuatu Cultural Center i putum aot wan ripot long manis Septemba beis long wan sevei blong ol kaljarol saet we divelopmen blong kolta rod long Pentecost bae i afektem olgeta. Long ripot ia ol jif mo pipol blong Pentecost i kat bikfala wari long kaljarol heritej we i konektem tradisenal valiu mo kastomari konekson long hat blong olgeta wetem graon stat bifo kasem tete.

Jif Philip i talem se sapos rod i damejem cave ia bambae efek blong hem i ko long ol woman long Central Pentecost mo taem oli mared i ko long Not Pentecost bae oli nosave weavem mat from oli lusum ol skil mo talent ia.

Ministri blong Jastis mo Kalja i diklerem se evri kaljarol heritej saet bitwin Baravet mo Ranmawot oli protekted anda Priseveson blong ol saets mo Atifakts Akt CAP 39.

Minista blong Justice mo Community Service, Honoroble Esmon Simon i saenem diklereson ia long namba 8 Okis 2021.

I kat wan totol blong eight kaljarol heritej saet evriwan bitwin Bwaravet mo Ranmawot oli protek.

Minista blong Infrastrakja mo pablik Utiliti, Hon. Jay Ngwele, i talem ristrikson ia bae i sloem daon spid blong divelopmen blong kolta rod.

Mr Ngwele i talem se i kat tim blong ministri i wok kolosap wetem ol otoriti risponsibol rigadem ol protek kaljarol saet ia.