Pipol i kol from help-COVID

Pipol i kol from help folem COVID situasen long ol hom.

Assistens Jif long Epau vilij, Jif Baklou Kai i talem se Kavman i kat plan blong help i ko long ol bisnis be hemi kwestenem weta bambae i kasem tu olgeta we i nokat bisnis.

“Naoia yumi stap long lokdaon hemi olsem wan disasta,” Jif Kai i talem.

“Olgeta we bae oli karem stimulus package bae oli kat mani mbe wat abaot olgeta we i nokat bisnis bambae yu fogetem mifala?

Jif Kai i kwestenem kavman se wanem nao hemi kat inples blong help sapos lokdaon ia i stap longtaem.

Gavman hemi assure seh financial position blong hem i strong mo money hemi hemi available blong helpem ol pipol

Long toktok blong Minista blong Finance mo Economic Management, Johnny Koanapo i talem toktok ia long National TV long tete.

“Cash posisen blong Vanuatu kavman long taem naoia hemi kwaet strong we i minim se wetem pandemic situasen blong yumi, i nokat nid blong panik,” Minista Koanapo i talem.

“Kavman hemi tekem anda kontrol long finans blong yumi.”

Be wan independent komen long Velene Jacob, wan experience woman long financial industry long kaontri, i talem se mani ia hemi sud ko long apgradem blong ol helt fasiliti mo long olgeta we oli no regista bisnis pipol.

“Olsem blong yumi save cater blong eni health emergensi sapos yumi kat sam bigfala sik,” Ms Jacob i talem.

“Sapos yumi lukluk gud fulap kaontri oli stap openem boda blong olgeta vinis. Mo mi luk se yumi mas investem mani long health mo letem bisnis i ron nomol from long wei ia yumi stimulatem economi mo bae i save helpem ol mama blong VT20 tu.

“So wetem stimulas pakej bae i kasem samfala nomo be yumi stap ova lukim olgeta we i stap mekem VT20 mo olgeta we i salem kava, mo oli stil fesem had taem.

Ms Jacob i komen blong talem i nid blong kat olgeta asesmen in ples we hemi soem se stimulus pakej hemi rili helpem pipol.

Hemi talem se i mas kat wan aktiviti blong lukluk bak long stimulas pakej ia blong luk se hemi helpem economic i ko kasem olgeta daon,” Ms Jacob i talem.

“Yumi bin klosem boda blong yumi blong sam taem vinis mo naoia wan bigfala scheme we i tekem mani hemi citizenship we i stap long saspensen naoia. Mo yumi sud lukluk i ko long wan longterm fix.

Minista Koanapo i konfemem se Council blong ol Minista i stap diskas yet long nambatri stimulas pakej.

Hemi talem se kavman i bin projectem 3.7 economic growth long yia ia mbe wetem jens naoia bai microeconomics komiti bai i sitdaon bakegen blong lukluk long hemia.

Minista Koanapo i talem se bae i kat wan graon breking blong wan niu health fasiliti i no longtaem we kavman bae i sapotem.

 

 

(Visited 114 times, 1 visits today)

About The Author

You might be interested in