Pipol i no alao blong travel i kam mo aot long Efate

Travel restriction blong Efate aelan i efektiv stat long wik ia folem kes blong COVID-19.

Spokespersen blong COVID-19, Len Tarivonda, i talem se National Disaster Komiti wetem National Disaster Management Ofis i tekem disison ia beis long rikomendeson blong Council blong ol Minister.

Hemi talem se lokdaon ia i minim se i nokat wan man, woman o pikinini i save travel i kam  mo aot long Efate long plen mo ship.

“Mi olsem Director blong Public Health, mi wantem asurem pablik se kes blong COVID-19 we i stap long kwarentin o boda, hemi wan kes we Ministry blong Health i save handelem from hemi stap long wan manej eria,” Mr Tarivonda i talem.

“Mo mi wantem asurem pablik tu se bae Ministry blong Health i kamaot tu wetem ripot blong hem long kes ia mbe risk long pablik hemi low.”

Mr Tarivonda i talem se ol pipol i no mas fraet mbe kontinu blong pratisim gudfala pablik hygiene mesa we Ministry blong Health i stap talem plante.

“Olsem washem han oltaem, physikol distancing mo ol narafala mesa we yumi putum in ples vinis,” hemi talem.

Prime Minister Bob Loughman i talem long Palamen long wik ia se muvmen blong ol cargo long ship mo plen i ko hed nomo.

“Council blong ol Minister i rikomendem tu blong ol international flaet blong repatriation i klos kasem feta notis mbe skul i operate nomo,” Prime Minister Loughman i talem.

Ofis blong Maritime Regulator long Port Vila i talem se hemi givim aot infomesen finis long ol ship owna blong komplae wetem disisen blong Kavman folem lokdaon ia.

Head blong Technical long Maritime Ofis, Kembro Mandersen, i talem se ol ship owna i aware finis se bai oli tekem in ol cargo nomo mbe oli no alao blong tekem olgeta pasenja long ship.

Mr Mandersen i askem long ol ship owna blong mas komplae long directiv we i kam long kavman, mo sapos oli no komplae oli save fesem penalty blong loa.

“I gat sam ship we oli bin aot long Santo vinis long eli wik ia mo oli stap long route blong kasem Port Vila mbe hemia bambae oli jes karem advise long National Disaster Management Ofis sapos ol ship ia i save kam shore long Efate o nogat,” hemi talem.

“National Disaster Management Ofis i bin advasem ship Princess Marie blong ol pasenja i save kam aot long ship tete morning.

“Mbe eni nara ship we oli bin stap long Santo mo redi blong aot, Ofis blong Regulator i bin advisim olgeta finis blong no tekem eni pasenja wetem olgeta mbe oli save karem cargo nomo.

VBTC i kasem toksave se Air Vanuatu i stopem finis ol domestic flaet blong hem mo naoia oli stap wok blong kam ap wetem ol schedule blong cargo flaet blong olgeta.

Director blong Education Service long Ministry blong Education mo Training, Samuel Katipa, i talem se skul i nomol blong ol skul pikinini mo ol parents i no mas panik.

Hemi talem se plante skul long kaontri oli stap ko tru long en blong yia exam blong olgeta espeseli ol final yia studen.

“Ol skul long ol provins i sud open i stap mo operate nomol olsem oltaem inkludum ol skul kominiti patisipesen mo taem yumi tokbaot hem ia yumi minim ol exam blong ol studen we bae i stap yet long nekis wik,” Mr Katipa i talem.

“Hemia olketa blong yia 10, 12 mo 13 mo yumi wantem se skul i mas operate nomol.

“Wetem mesej ia mi stap askem ol principal mo tija blong regulatem gud flow blong ol studen we oli stap kam insaed long skul eria.”

Mr Katipa i talem se ol staff blong ministry i no save aot long Efate blong visitim ol skul truaot long kaontri folem lokdaon mbe enkarejem ol skul blong kontinu blong praktisim hand washing mo meintenem physical distancing.

“Ol skul oli mas kontaktem education ofis long ol provins or assessem website blong Depatman long Education,” hemi talem.

 

 

(Visited 742 times, 1 visits today)

About The Author

You might be interested in