Pipol i praktisim COVID rul blong stap sef

Plante lokol long Port Vila i talem se COVID i fosem olgeta blong werem fes mask mo washem hand blong stap sef.

Wan Jif blong Erakor long saot Efate, Dennis Kalmet i talem se hemi wan niufala fasen blong aplaem blong stap long sef saed.

“Taem mi werem fes mask, i kat sam pastor blong jej i bin tok akensem se mi nokat faith, “ Jif Kalmet i talem.

“Mbe mi mas talem se faith hemi stap long evri samting from Bible i talem se taem yu prea yu mas kat faith wetem aksen, sapos aksen i nokat, prea ia hemi ded.

“Taem yumi prea, yumi werem fes mask from yumi save se yumi sef.”

Jif Kalmet i enkarejem ol pipol blong Erakor blong werem mask taem oli walkbaot long ol pablik ples.

John Alick long Sound Centre Duty Free sto long Port Vila, i talem se evri staff blong olgeta i werem fes mask taem oli arem nius se wan Philippino crew i ded mo oli faenem hem long Pango point long Efate.

“Mifala i bin sherem ol fes mask long evri staff fastaem vinis,” Mr Alick i talem.

“Naioa taem yu kam long sto, bae yu mas washem hand bifo kam insaed.

“Mo bae yu luk tu se evri staff i werem ol fes mask taem oli dil wetem ol kastoma.”

Spokespersen blong COVID-19, Russel Tamata, i talem se ol simpol protocol blong COVID olsem washem hand wetem sop, werem fes mask mo social distancing i helpem pipol blong no kasem virus ia.

“Yumi long Ministry blong Health i oltaem tale mol rul ia blong pipol i kontinu blong praktisim long ol wok ples o skul,” Mr Tamata i talem.

“Sam pipol bae oli filim i no stret blong werem fes mask mbe taem oli stat blong werem, bae oli luk se hemi stret mo nomol nom oblong werem.

“I semak olsem washem hand, taem yumi stat blong washem hand, bae yumi developem wan habit blong washem han evritaem.

“Yumi no save fosem pipol blong aplaem ol rul ia, mbe sapos oli fil se hemi risponsibiliti blong olgeta blong praktisim mo stap sef bae hemi wan wei blong stopem spread blong virus.”

Simon Moli long Wanfuteng Bank long Port Vila, i talem se oli limitim namba blong ol kastoma i kam insaed long bank from social distancing.

Hemi talem se fulap kastoma oli stap nomo outsaed mo yusum ol ATM machine.

Wan bus draeva we i no wantem nem blong hem i kamaot, i talem long VBTC Nius se, hemi stat blong werem fes mask mo aplaem hand sanitizer taem hemi jensem mani blong ol kastoma.

Hemi talem se i luk gud taem oli draev pas long town, mo luk fulap bisnis haos i instolem ol station blong mas washem hand wetem sop.

Vanuatu i stap long secenario 2(a) mo 2(b) we i minim se ol bisnis, skul, market mo pablik gathering i kohed nomol mbe ol pipol i mas kontinu blong praktisim ol health mesa blong washem hand mo social distancing.

 

 

 

 

 

 

 

 

 

 

(Visited 194 times, 1 visits today)

About The Author

You might be interested in