Plan blong international boda i no klia

Rod map blong Vanuatu i openem boda i no klia yet.

Director General long Ministry blong Health, Henry Vira, i talem se rod map ia i stap long draft mo taem oli presentem long Kavman bae i ko tru long Council blong ol Minista blong oli redi long hem blong pablik i save.

Mbe Director General Vira i talem se i kat plan blong mekem awenes.

Mr Vira i talem toktok ia blong rispon long kol blong Vaturisu Council blong ol Jif konsenem klia plan blong openem boda.

“Mi tink se isu we jif i mekem hemi rili valid, mo mifala i tekem on bod, se i mas kat wide konsaltesen patikulali long entry we hemi Efate long Shefa provins,”Mr Vira i talem.

“Mifala i tekem ol konsen ia i serious from i nokat gudfala awenes i hapen. Taem yumi tokbaot boda tri steij secnario, yumi fokas long vaccination reit, health redines mo ol wanem criteria nao ministry i stap wok long hem.”

Jeaman blong Vaturisu Council blong ol Jif, Jif Simeon Poilapa, i talem se kavman i mas klia wetem ol plan blong hem from oli nosave se Efate nomo bae i open o ol nara aelan long kaontri.

Jif Poilapa i kwestenem tu stik meresin blong olgeta pikinini anda 18 yia.

Hemi talem se hemi no sef blong boda i open mo oli no tekem stik from oli futja blong Vanuatu.

 

 

(Visited 259 times, 1 visits today)

About The Author

You might be interested in