Plan frantlin kompolseri COVID vaccine

Kavman i gat plan blong i wan mas blong ol frantlin wokman i tekem COVID vaccine.

Director blong Public Health, Len Tarivonda, i talem toktok ia long VBTC Nius long wik ia folem plan blong kavman blong openem boda.

Mr Tarivonda i talem se plan ia bae i hapen nomo afta long declaration blong Pablik Helt Emergency anda long Pablik Helt Act amendmen we Palamen i just pasem long May yia ia.

Hemi talem se kompolseri vaccination bai i hapen nao long ol frantlin wokman olsem olgeta we oli facilitem repatriation, olgeta we oli security long kwarentin, transpot mo olgeta long boda.

“Opening blong boda hemi wan samting, mbe narafala samting se ful kauntri blong yumi i stap long risk, hemia folem situation we ol neighbouring kauntri blong umi i gat wetem Delta Variant,” Mr Tarivonda i talem.

Mr Tarivonda i talem se State Law i bin advisim olgeta finis se kompolseri  vaccination oda bai i no akensem raet blong olgeta krup ia anda long constitution from hemi wan mata blong pablik oda, helt mo welfare blong evriwan.

“Naoia, oda ia i no kam efectiv yet, mbe task fos blong COVID-19 i stap wok long hem naoia,”Mr Tarivonda i talem.

“Advaes i kam long state law se taem yumi muv i ko long wan declaration blong pablik helt emergency, yumi mas removem State blong Emergency we i stap naoia.

“Pablik Helt Act amendmen i givim enaf pawa blong yumi operate anda long pablik Helt emergency.”

“I gat sam nomo long securiti olsem polis mo ol transpot draeva we oli no tekem yet COVID vaccine,” Mr Tarivonda i talem.

“Fulap long ol frantline olsem ol helt worker, 92 percent oli tekem finis stik meresin, folem wetem airports, sea ports, custom mo immigration.

Director Tarivonda i talem se Helt tim bai i arenjem wetem olgeta bakeken ol awarenes session blong olgeta.

“Sapos virus i kam insaed long kaontri, bai i kam tru nao long boda, so hemi impoten blong mekem sua se ol frantline institution inkludium polis, transpot draeva, olgeta we oli involv long kwarentin i mas vaccinate. Mo hemia yumi save isuem kompulsari vaccination oda i ko blong adressem eria ia,” Mr Tarivonda i talemaot.

Helt i talem se afta long ol wok we oli mekem, bai oda blong kompolseri vaccination long ol frantline wokman bai i kam efectiv long period blong wan o tu manis.

(Visited 652 times, 1 visits today)

About The Author

You might be interested in