Plante seasonal wokman i stap wok yet ovasea

Wan bigfala namba blong ol Ni-Vanuatu seasonal wokman i stap wok yet long Australia mo New Zealand.

Komisina blong Labour, Murielle Metsan Meltenoven i talem se konfemesen we hemi tekem long Kavman blong Australia, se i kat ova 1000 Seasonal Workers Program (SWP) wokman long Australia oli stap wok long ol nara fam vinis mo oli kat wok i stap.

Hemi talem toktok ia tru long Australian Broadcasting Tok pisin servis.

“Disisen we oli tekem bae i helpem tu ol famili blong olketa,” Mrs Meltenoven i talem.

“Ol seasonal wokman we oli stil tekem pat long program long taem olsem, hemi blong mekem moa mani tu.

“Long saed blong ol Recognised Seasonal Employer (RSE) wokman blong Vanuatu, i kat ova long 2000 wokman i stap yet long New Zealand.”

Mrs Meltenoven i talem se total namba blong ol RSE Ni-Vanuatu wokman oversea hemi 3755 mo olketa we oli kambak vinis long kaontri hemi 1000.

“So namba i ko daon long ova 2000 wokman we oli stap wok yet,” hemi talem.

Mrs Meltenoven i talem se “Bae mifala i continu blong akomodatem olketa long repatriation flaet long manis August.”

Plante seasonal wokman long New Zealand i talem long VBTC tru long social media se bae oli kambak nomo long kaontri long August.

Wan SWP wokman long Australia i talem se nawia oli ko wok bakeken long wan nara fam finis.

(Visited 119 times, 1 visits today)

You might be interested in