Plante yut long Port Vila i wantem wok

Indaksen miting blong Youth Challenge Vanuatu long March i pulum intres blong ova 600 yut long Port Vila blong mas kasem wok.

Director blong Youth Challenge Vanuatu, Noel Sawia, i talem se ol yut ia hemi wan hae namba we oli drop aot long ol skul long kaontri mo i givim bigfala wari.

Hemi talem se Youth Challenge Vanuatu i dabolem namba blong rigistresen long yia ia kompea long 2020.

“Miting ia hemi blong invaetem ol yut blong kam mo helpem olgeta long ol trening blong oli save kat seken janis blong wok o mekem own bisnis blong olgeta, “Mr Saiwia i talem.

“Fulap long ol yut ia oli soem intres blong rili wantem ko long ol Redi blong Wok prokram blong kat moa skil mo save blong kasem wan wok long futja.

“Ol yut ia hemi olgeta we oli vinis nomo long primary skul, long yia 8 o 10.

“Wanem mi faenem i niu long yia ia, se i kat sam studen tu we oli ko skul ovasi mo oli kambak long kaontri wetem ol pepa blong olgeta mbe oli no faenem wok yet mo hemia i inkludum olgeta studen we oli skul long ples ia tu.”

Youth Challenge Vanuatu hemi wan Non-Government Organisation we i  kat fo opsen blong seves we hemi stap helpem ol yut long hem, Redi blong wok, Redi blong Bisnis, Youth Center Service mo Wok i kik online employment services.

Youth Center Services i kat wan computa lab blong ol regista yut i kat akses long hem evri dei blong typem aot ol wok aplikesen, Curriculum Vitae, jekem ol email, lanem hao blong yusum wan computa mo ko online blong lukoatem ol wok aplikesen long wok i kik website.

Non -Government Organisation ia hemi stap kivim ol shot trening, awareness mo career tok long ol memba blong yut ia.

Redi blong wok prokram hemi ofarem ol seleksen, mekem rikruitmen, mo ofarem trening mo internsip plesmen long wan period blong six manis.

Hemi ofarem tu ol seleksen, trening mo provaedem VT 40,000 olsem wan grant mani blong mekem ol bisnis plan blong olgeta yut i wok.

Lilly Fred, wan lokol yut long Port Vila, i talem se hemi glad bigwan blong pat long redi blong wok program from hemi luk se bae hemi kat janis blong kasem wan wok long futja.

“Mifala plante long ol yut ia i vinis nomo long class 6, sam yia 8 mo 10 mbe mi glad from mifala i kat seken jans blong save learn mo wok blong helpem ol famili blong mifala,” Ms Fred i talem.

“Long ol komuniti we mifala i kamaot long hem, pipol i luk mifala olsem nating nomo mbe mi glad we long ol seves blong youth challenge blong step ap mo sapot.”

Secretary blong Vanuatu National Youth Council, John Bolteng, i talem se samfala yut ia oli nomo save kontinu long skul from mani.

“Mi glad tumas long gudfala tinktink we Yut Challenge Vanuatu wetem ol patna blong olgeta oli stap mekem blong sapotem ol yangfala ia from oli ol futja blong kaontri ia,” Mr Bolteng i talem.

“Hemia blong givim olgeta seken janis blong oli learnem moa mo helpem divelopmen blong nation ia.

“Olgeta yut ia oli kam long ol difren komuniti long Port Vila wetem ol difren bakraon mo oli stap long nid.”

Mr Sawia i talem tankiu long Secreatry  blong Vanuatu National Youth Council, Mr Bolteng, blong hemi save help faenem ol yut ia long ol difren wod long Port Vila blong kam kat ol trening.

“Hemia i wan jalenj blong yumi blong faenem ol wok blong ol yut ia afta long ol trening blong olgeta mbe bae mifala i wok kolosap wetem moa wetem ol nara Non-Government Organisation, Kavman mo Private sector blong kivim wok long ol yangfala ia mo bildim ap skil mo save blong olgeta.

“Youth umemploymen hemi bigwan long kaontri tete mo mi luk se long nekis miting bae namba blong ol yut i kontinu blong inkris.”

Blong wan yut i pat long ol prokram blong Youth Challenge Vanuatu hemi VT 100.

Ol fom blong aplikesen i stap long Youth Challenge Vanuatu ofis long Port Vila.

 

 

 

(Visited 330 times, 1 visits today)

About The Author

You might be interested in