Polis i handelem COVID crew wetem handglove

Ol Polis Ofisa we oli handelem ded bodi blong Philipino crew long Pango i bin yusum fes mask mo handglove.

Director blong Criminal Investigation Dipatmen long Vanuatu Police Force i konfemem wetem VBTC Nius long eli wik ia.

Jack Joses i talem toktok ia folem plante komplen we i kamaot abaot handeling blong ded bodi taem polis i atendem scene.

Hemi talem se “Even we i nokat wan foto long social media we i soem ol polis ofisa i holem ded bodi wetem fes mask mo handglove bae mi mas talem se oli bin yusum.”

“Foto we i ko raon long social media ia, we yumi luk sam polis ofisa i stanap raon long bodi hemi olgeta we oli no bin handelem ded bodi,” Mr Joses i talem.

“Olgeta ia pa mi talem se oli no bin tajem ded bodi.”

Spokespersen blong COVID-19, Russel Tamata, i talem se ol ofisa we oli bin ko kolosap long ded bodi blong crew oli bin ko long kwarentin mo ol test i soem se oli test negativ.

Hemi talem se i kat tu pipol we i swim from ded bodi blong crew ia mo tufala tu i test negativ long COVID.

VBTC i kasem ripot se Australia Maritime Union i askem blong Australia i wok wetem Vanuatu long investiketem ded ia from gas ship ia hemi bin aot nao long Australia.

Director Joses i talem se risk blong expos long COVID-19 i mekem se polis i stopem investikesen long ded blong man philipino ia.

Hemi talem se pathologist i rilisim ded bodi finis mo hemi advaes blong i nogat any autopsy i tekem ples from risk blong COVID.

“Investiksen blong leit crew ia i no save kontinu from we ship we man Philipino ia hemi kamout long hem, kavman i bin sendem i ko bak,” Mr Joses i talem.

“Ship blong gas ia, Inge Kosan hemi stap olsem prime crime scene blong investikesen.

“Taem i kat wan man ovasi i kam ded long graon blong Vanuatu, polis i kat raet blong kondaktem investiketem mbe wetem sekomstans we i stap wetem COVID-19 i mekem se i no posibol.

Director blong Foreign Affairs, Yvon Basil, i talem se oli stap wok yet long hao blong sendem ded bodi i go bak long ol famili blong crew ia o plan blong berem nomo long Port Vila.

Ded bodi blong man philipino i stil stap long haos blong ol ded man long Vila Central Hospital.