Polis i investiketem ol rapis toktok long sosol media

Ol pipol long sosol media i mas post o komen wetem rispek.

Vanuatu Polis Fos i apil long sosol media blong pablik i soem rispek long ol polis folem wanem we hem i talem se sam pipol i stap “swe long ol polis ofisa long sosol media,” folem alekesen blong polis brutaliti.

Hem i talem se pablik i mas alawem polis blong mekem wok blong hem blong dil wetem isiu long Big Bay Bush.

“Polis bae i mekem ol apropriet inkwaeri, mbae hem i investiketem ol post long sosol media mo dil wetem any wan we i swe long ol polis man o woman long sosol media,” hem i talem.

“Hem i veri shemful mo very sad blong lukim ol citizen oli stap swe long ol polis ofisa mo ol famli blong olgeta.

“Mi stap apil i ko long ol citizen blong Vanuatu blong kontinu blong sapotem polis blong karemaot ol wok blong olgeta.”

Gerard Metsan, Jif Infomesen Ofisa blong Kavman, i talem se, olgeta i gat wan Memorandum blong Understanding wetem Vanuatu Polis Fos. Memorandum blong Understanding ia hem i alawem tufala institution ia blong wok tugeta blong dil wetem ol isiu long sosol media.

“Ol polis oli gat otoriti blong dil wetem eni ofens long sosol media. Olgeta i save prosecutum eni wan we i ofendem narafala man long sosol media, sapos oli kasem ripot blong hem.

“Mifala i wok nomo wetem ol polis blong trakem daon ol ofenda ia long sosol media mbe ol polis nao oli gat ful otoriti blong prosecute.”

Hem i talem se i bin gat sam kes we olgeta i help blong trakem daon ol ofenda mo polis i bin prosecutum olgeta.

Mr Metsan i talem se mbe oli stap fesem plante jalens blong dil wetem ol isiu long facebook.

“Mifala i bin stap dilitim plante fake akaon long sosol media. Sapos mifala i dilitim wan naoia, long les than wan haoa, sem akaon ia oli kriatem bakeken mo riloadem everi sem post we mifala i bin dilitim. So hem i veri difikol blong dil wetem ol isiu ia.”

Jif Infomesen Ofisa blong Kavman ia, i talem se, solusen we hem i stap naoia hem i blong Vanuatu i mas pasem Bill blong Cyber Crime Act. Act ia hem i provaedem blong kaontri i save dil wetem ol computa ofens mo ol semak isiu online.

Bill ia hem i bin ko long Palamen long 2018 mbe hem i no bin pass.

Mr Metsan i talem se mbe naoia pipol i save ripotem ol ofens long polis, polis bae i wok wetem Ofis blong Kavman Jif Infomesen Ofisa (OGCIO) blong trakem daon ol ofenda ia mo polis i save prosekutum olgeta.

(Visited 79 times, 1 visits today)

You might be interested in