Polis i no awea long Sarete kleim

Polis Commander Not hemi no awea long ol kleim we Sarete vilij i mekem be hemi se bae hemi lukluk long hem.

Eli long tete, Jif John Turu i talem se bae oli mekem wan protest sapos i nokat eni resolution be tete afta long diskasen health tim i sotem aot.

Jif  Turu i bin resem konsen long hao pipol i nosave akses long ol seves long taem blong emergency.

“Mifala i fesem sam jalenj we i moa had; i kat tu pikinini we oli jes kasem mifala we oli sting vinis(ded); oli sting long hospital oli jes kam daon; mifala i nomo save ko karem ol from i kat wan lokdaon,” Jif Turu i talem.

“I kat sam mama long mifala oli nosave bonem bebe from se oli yang tumas mo oli mas stap long vilij koko oli bonem. I kat sam mama we oli kat bel naoia oli nomo ko karep meresin from bigfala lokdaon ia long crossrod.

“Ale skul pakej blong ol pikinini blong mifala taem blong hem i pas vinis we oli sud vinisim mbe lokdaon i mekem mifala i nomo save karem. Folem ol risen ia mifala ia nao mifala i wantem mekem wan protes.”

Commander Not, Willie Samuel, i talem se rod blok hemi jes blong kontenem Sarete hem wan nomo blong ol famili i no muv araon.

“Sik man blong nogat akses i ko long hospital hemia i no tru, ” Mr Samuel i talem.

“Eni nara man long ol nara eria blong kat askes i kam long Luganville o ol nara health fasiliti i nogat man i stopem. Evri esential seves hemi open blong ol man i kat akses long hem. Sapos man hemi tink se i kat violation long ol raet blong hem, igud blong oli kam stret long mi olsem commander blong Polis be blong stap spreadem ol toktok olbaot bae mi no tekem tumas. Mi plis blong yu sapos yu kat eni sik yu mas talem.

VBTC Nius i kasem infomesen se wan mama long saot Santo i ko blong bonem bebe long Northern Provincial Hospital long Thursday mo tufala(twins) i ded long semak dei ia nomo mo long Sunday bodi i jes kasem Sarete.

Jif Turu i talem tu se wan lokol long komuniti gel blong hem i sik bigwan mo hemi wantem tekem hem i ko long wan klinic long Saot Santo nomo mbe polis i bin stopem hem.

Jif Turu i kol blong klarifaem from wanem i gat COVID-19 kes long ol difren komuniti long Sanma be i nogat strik lokdaon.

“Olgeta long Port Olry i kat lokdaon be ol pipol i kam long Luganville mo gobak,” Jif Turu i talem.

“Long Showground i kat lokdaon, pipol i nosave ko long eria ia be man i save kam long town.

Jif Turu i talem se Sanma Helt i nid blong stap kivim klia infomesen abaot namba blong ol COVID-19 kes long komuniti ia blong helpem komuniti kwarentin.

Manager blong Sanma Public Health, Vanua Sikon,  i talem se komuniti i save aksesem esential seves be i kat strik COVID-19 rul i stap.

Hemi talem se komuniti i stil kat sam positiv kes blong COVID mo oli no fri yet.

Mr Sikon i talem se ol polis ofisa i aot long graon mo naoia COVID tasfos komitee oli askem olgeta blong ko hed aplaem ol strik COVID rul long komuniti.

Hemi talem se Port Olry mo Showground i difren, i kat outbrek blong sik be long Sarete hemi kat kes we health i traem blong kontenem nomo long eria ia.

“Long Friday i kat tim blong surveillence oli ko long Satete mo kondaktem sam tes raon long komuniti,” Mr Sikon i talem.

“Yumi bin lukluk long ol tes mo kamap wetem wan ripot.Mo tete oli kobak blong infomem komuniti long wanem feta aksen.

Mr Sikon i talem se wanem oli mekem hemi random test blong tekem i ko long lab long Luganville blong oli luk mo provaedem ol strik rul.

Hemi talem se health i bin wok wetem polis blong tekem bak bodi blong tufala bebe i kobak long saot.

 

(Visited 748 times, 1 visits today)

About The Author

You might be interested in