Polis Sanma i stap investiketem tri ded

Polis long Santo i stap investiketem tri ded long aelan blong Santo folem alekesen blong suicide long March mo tu i ded long solwota long eli April .

Acting Commander Sanma, Afremen Kender, i talem long VBTC Nius se, long kes blong suicide, insiden i bin hapen long Mon Exile eria we i lukim wan woman i hangem nek blong hem wan.

Mr Kender i talem se polis i arestem hasban blong woman ia olsem wan saspek, folem ripot se hemi wan man we i smokem tumas marijuana.

Hemi talem se oli kasem plante ripot tu long ol famili blong woman ia abaot aksen blong hasban blong woman ia mo investikesen i stap ko hed naoia.

“Hasban blong woman ia, Polis i bin arestem hem mo hemi stap long custody naoia,” Mr Kender i talem.

“Woman ia i bin hangem nek blong hem outsaed wetem wan blu nylon long wan haos farea long yad blong hem nomo wetem hasban blong hem.

“Taem ol famili oli faenem hem long moning oli bin kondaktem polis long wan taem we i leit, from taem mifala i ko mbe oli berem woman ia vinis.

“Yumi save se Mon Exile eria hemi longwe lelbet long mein town, Luganville.

“Wanem mifala i mekem, mifala i sendem wan aplikesen i ko long kot mo hemi grantem wan oda blong mifala i ko digim ap grave.

“Hemia blong alaoem bodi blong leit woman ia i ko long Autopsy blong faenm stret cos blong ded.”

Acting Sanma Polis Commander, Mr Kender,  i talem se nara insiden i hapen long solwota we i involvem wan papa mo boy blong hem taem tufala i bin ko huk long East Santo long Easter mo tufala i nomo kambak hom.

“Insiden ia i hapen long Kole tu vilij taem tufala i ko blong lukaotem fish long solwota,” Mr Kender i talem.

“Polis i bin helpem ol lokol wetem ol diva long ol risot kolosap wetem search mbe oli faenem nomo boy mbe papa i lus i stap.”

VBTC Nius i kasem toksave se search tim i stop vinis blong lukaotem man ia.

Polis long Sanma i askem pipol blong stap sef mo walkbaot wetem kea oltaem.