Port Vila City i gat niu flag mo coat of arm

Port Vila City Council hem i gat naoia wan niufala flag mo coat of arm.

Port Vila City Council hem i reisem flag ia long Feiawa Park mo unveilem coat of arm ia long selebresen blong Port Vila Dei long tedei.

Town Clerk blong Port Vila City Council Peter Sakita, hemi talem se jenis we i hapen hemi blong putum stret ol protocol.

“Tingting blong mekem re-branding eksasaes insaed long Port Vila Municipal hemi blong putum stret ol protokol mo standed blong city blong Port Vila blong i kam antap semak long standed blong ol nara city raon long wol mo long region weh oli stap wok folem,” hem I talem.

Hem i talem se naoia coat of arm bae oli yusum nomo long stret fasin blong yusum.

“Bifo, yumi luk coat of arm blong Port Vila City  hem i stap long everi samting long flag blong city council, blong ol trak blong hem even long yellow bag blong toti,” Mr Sakita i talem.

Hem i talem se naoia oli save se blong folem ol stret protocol blong wan kavman hemi tapu blong putum coat of arm olbaot, mas yusum nomo long stret ples blong hem.

Afta long unveiling blong coat of arm mo flag raising, i kat wan custom ceremony we Port vila City Council hemi mekem i go long Paramount Chief blong Ifira blong talem tankiu long kraun we Port Vila City i stap long hem naoia.

Theme blong Port Vila day long yia ia hemi ‘Bildim wan united diverse mo Resilient City’.

Long yia ya hemi makem 43 yia blong Port Vila City Council.

Praem Minista blong Vanuatu, Bob Loughman, Deputi Praem Minista, Ismael Kalsakau, Spika blong Palamen, Gratien Shadrack mo Lida blong Oposisen, Ralph Regenvanu oli joinem wan parade long tedei moning blong comemoratem impoten dei blong Port Vila City.

Lord Mayor blong Port Vila City Council, Erick Fester, Mayor blong Luganville mo Mayor blong Lenakel oli bin pat tu long maj ia.

Wan long ol haelaet blong dei ia hemi taem paramount jif blong Ifira, Jif Mantoi Kalsakau, i travel long seling bot, Okeanos i kam shoa long Feiwa Park blong pat long selebresen blong dei ia.

(Visited 267 times, 1 visits today)

About The Author

You might be interested in