Posibol measles outbrek woning

Ol health otoriti i givim woning se i likeli blong kat measles outbrek long July folem low reit blong stik.

National Immunization Coordinator long Vanuatu, Samson Arnitalu, i talem se aot long kaverej blong measles vaccination long Pacific, Vanuatu hemi kam bihaed wetem 50%, hemia i soem klia se i kat risk long pikinini we age blong olgeta long 0-1 sapos boda i open.

Mr Arnitalu i talem se low kaverej ia hemi from ol mama o ol caregiver oli fraet blong tekem ol pikinini i ko kasem stik long ol health senta.

Hemi talem se Vanuatu hemi tekem vaksin blong COVID i kam insaed mo ol mama oli harem fulap toktok abaot stik meresin we  distebem bigwan stik blong measles.

“Taem we yumi lukluk i ko bak long 2021, stat long January kasem long December we yumi ko hed blong rolem aot COVID stik, plante man i no wantem tekem stik, i mekem se kaverej blong measles hemi kam taon long 50%,” Mr Arnitalu i talem.

“Percentej ia hemi haf blong taget populasen blong yumi we nomo we oli tekem measles stik wetem ol nara stik olsem Tuberculosis mo Hepatitus B.

“Wari blong yumi nao hemi measles from measles yumi save hemi live insaed long region mo 87 pikinini i ded long Samoa i ded long hem.

“I mekem se mifala i stap ko hed blong ranem ol program blong stik blong enkarejem bak ol nurse long ol provins blong oli ko bak mo kam ap wetem sam plan long hao oli pasem ol infomesen blong enkarejem stik meresin se hemi impoten.”

Long 2019 i gat wan outbrek blong sik measles long kaontri blong Samoa.

Long namba January 6 2020 i gat ova 5,700 kes blong measles mo 83 i ded. I gat ova 3% blong population blong Samoa i kasem sik ia.

Kos blong outbrek ia oli putum se hemi folem nomo low reit blong vaccination reit blong Measles – 74% long 2017 i kam daon long 31-34% long 2018.

Samoa hemi diklerem State blong Emergency long Novemba 17 mo odarem evri skul blong i klos mo stopem ol yangfala blong 17 yia i kam daon blong oli no ko long ol pablik ples.

Long December 2 2019 Kavman hemi putum wan curfew mo kanselem evri xmas selebresen mo pablik gathering.

Vanuatu i save sef nomo sapos i gat 90-100% blong ol pikinini oli risivim stik.

 

 

 

 

 

(Visited 355 times, 1 visits today)

About The Author

You might be interested in