President blong Shefa Football i lus

Presiden blong Shefa Football Association i lusum laef blong hem long wik ia.

Leit Tane Maki blong Paunangisu vilij long North Efate i ded long Saupia Health Center long Paunangisu folem alegesen se hemi sik.

Presiden blong Vanuatu Football Federation, Lambert Maltock, i talem aot sori mesej blong Vanuatu Football Federation mo evri memba association blong hem i ko long famili blong leit President blong Shefa futbol association

Mr Maltock i talem se leit Tane Maki hemi bin serve olsem President blong shefa futbol association blong ova 15 yia.

“Leit Tane Maki bae i stap oltaem mo foeva long heart blong Port Vila Footbal Association from hemi man behaen long sakses taem tim shefa emi winim fes eva Vanuatu Football Federation National League Cup 2020,” Mr Maltock i talem.

“Las give away praes mo seremoni we i givim hemi taem hemi prisentem praes i ko long jampion blong shefa futbol association 2021, Eranio Football Club.

“Eranio Football Club bae i ripresentem Shefa futbol long next wik kompetisen long Vanuatu Football Federation Champion League 2021 withaot leit Tane Maki olsem Presiden blong olgeta.”

Vice Chairman blong Shefa dei selebresen 2021, Fred Samuel, i talem sori bigwan long lus blong leit Tane Maki.

“Hemia wan sad taem tru we yumi lusum wan risosful man blong Shefa provins,” Mr Samuel i talem.

“Hemi wan man we i sapotem plante futbol long Shefa provins.

“Prea blong mifala i stap wetem ol famili long sad taem ia.”

Leit Tane Maki bae oli berem hem tete aftanun.

 

 

 

 

(Visited 15 times, 1 visits today)

About The Author

You might be interested in