Private sector i askem seken raon blong Stimulus package

Private sector i askem Kavman blong mas muv fowod wetem ol akrimen we tufala i bin kat blong helpem survivol blong olgeta long ol kontinu impak blong COVID-19.

Vanuatu Chamber blong Commerce mo Industry wetem ol memba blong hem oli mitim kavman long wan namba fo hae level diskasen i no longtaem.

Vanuatu Chamber blong Commerce mo Industry i diskribem se Vanuatu naoia hemi stap long seken wave blong ol impak blong COVID-19.

Oli talem long hae level diskasen ia se plante bisnis oli klos daon mo pipol oli kontinu blong lusum wok mo oli fil se kavman hemi mas mekem moa.

Minister blong Finance mo Economic Management, Honoroble Johnny Koanapo, i talem se kavman hemi help plante wetem fulap vatu long las yia.

“I kat plante mane we kavman hemi putum aot finis, mbe Private sector hemi fil se i no enaf yet,” hemi talem.

Minister Koanapo i askem blong Private sekta i mas provaedem wan concrete solution long ol jalenj we oli stap tokbaot mo bae oli kam bak long wan nara raon table diskasen.

“Kavman ia hemi open long ol proposal blong private sector, sapos oli fil se i kat olgeta isu we kavman hemi nid blong adresem oli nid blong mekem ol proposals ia long writing, inkludum ol kost.”

Ol diskasen hemi bin lukluk long ol wok blong, Implementation blong Tamtam bubble, Stimulus Package rikwest blong 2021, Commercial banks blong oli kontinu blong asistim ol SME, review long reserve occupation, Revision mo signing blong bilateral trade agreement wetem New Caledonia, alaoem ol skill technicians blong kam long kaontri, Alaoem remote wokman, Alaoem inkris blong Recognised Seasonal Employee mo Seasonal Workers Program migration mo lukluk long isu blong export.

Ol bisnis man long raon table ia oli talem se some akrimen blong kavman,  implementation blong hem i slo tumas olsem adresem hae kost blong export.

Ol Minista long raon table diskasen ia oli askem olgeta long Vanuatu Chamber blong Commerce mo Industry blong mas stap folem ap klos ap olgeta public servants long ol implementation blong ol akrimen we oli kat.

“Fulup holdap hemi long hao blong ranem mo hao blong putum ol loa, ol minister i askem blong yumi mekem folem ap wetem ol public servant blong olgeta blong mekem sua oli muv fowod wetem ol disisen we kavman i akri lem finis,” Presiden blong Vanuatu Chamber blong Commerce mo Industry,  Antoine Boudier i talem.

Longtaem ia Deputy Prime Minister, Honoroble Ishmael Kalsakau, mo Minister blong Trade,Tourism mo Ni-Vanuatu Business, Honoroble James Bule i bin konfemem se kavman bae i statem Tamtam bubble wetem New Caledonia long manis March.

Long saet blong stimulus package i lukim se kavman i nidim ol data blong hamas bisnis oli stap kontinu blong fesem jalenj.

 

 

 

 

 

 

(Visited 391 times, 1 visits today)

About The Author

You might be interested in