Propa kaedlaen i mas kat inples

Vanuatu Financial Intelligence Unit i askem Bless to be Blessed bisnis blong kat ol propa kaedlaen inples bifo en blong wik.

Afta long wan miting wetem Financial Intelligence Unit long Monday wik ia, oli faenem se i kat risk long investmen blong pipol mo advaesem bisnis blong i mas putum ol kaedlaen ia.

“Yumi harem se bigfala promes blong return mbe mifala i fil se proteksen blong ol kastoma sapos oli no recievim mani blong olgeta, proteksen ia i nokat gudfala mining insaed long kaedlaen blong bisnis,” Director blong Financial Intelligence Unit,  Floyd Mera i talem.

Financial Intelligence Unit i wantem luk se sapos wan man i givim mani mo sapos hemi nomo karem bak, wanem nao bae i mekem blong i tekem bak.

“So mifala wok wetem olgeta naoia blong bisnis hemi putum ol mesa inples bifo en blong wik ia blong mifala save satisfae wetem corporation”

Miting blong Financial Intelligence Unit wetem bisnis long wik ia i folem ol konsen we i bin kamaot afta we bisnis ia hemi open ap long pablik. Plante oli singoutem se hemi wan scam mo Vanuatu Chamber blong Commerce mo Industry i wonem pipol abaot investmen long kaen scheme olsem.

Director Floyd Mera i talem se hemi wan sapraes taem oli harem se bisnis ia i open ap long pablik.

” Long wanem mifala i harem se aktiviti ia hemi dil wetem ol klos group of fren o associate we oli wantem reisem fand long olgeta, mbe mifala i awea naoia se bisnis hemi open ap long pablik mo hemia i kriatem wan risk we mifala i faenem, mo mifala i wantem storian wetem bisnis owna, asesmen risk ia mo helpem bisnis blong putum ol mesa blong ridusum risk ia.”

Bless to be Blessed busines hemi descriped olsem wan crowd fand platform.

Crowd funding platform hemi wan wei we pipol, business mo charity oli reisem mani. Hemi work taem ol man oli sakem mani blong reisem mani blong wan memba. Mbe hemi wan risk investmen from sefti blong investmen.

Long Port Vila niufala scheme we hemi kerup i tekem 21 dei blong wan memba i karem riten blong hem we hemi faev taem mo long investmen.

Long wan amaon blong  VT5,000 deposit wan man i save karem wan return blong VT 38,000.

VBTC hemi bin mekem some atempt blong toktok wetem owna blong scheme, Jenny David, mbe hemi talem se hemi nosave mekem eni komen from we bisnis hemi jes setup nomo.

VBTC News i andastanem se scheme ia hemi bin start wetem ol mama we oli stap somap long Center Point, olsem wan komuniti aktiviti blong sapotem wan wan long olgeta, Jenny David we nem blong hem i stap long bisnis ia i mekem i kam aksesibol long pablik.

Owna blong bisnis hemi no wantem givim eni komen long taem ia , mo tu ofis i muv tete i ko narasaed long University blong South Pacific. Mbe i kat fraet i stap se wetem hae namba blong pablik we oli kam memba, hao nao bai scheme ia save sastainem olgeta.

Reserve Bank blong Vanuatu hemi bin dileiem lonj blong wan crowd funding platform last yia from we i nogat ol stret loa long kaontri we i stap inples blong regulatem kaen activiti olsem. Mo oli warn se crowd funding hemi karem mani tru long pablik deposit, i nogat proteksen blong man we i deposit. Oli talem hemi impoten blong i mas kat ol legal framework i ples bifo wan kaen scheme olsem i save kerup.

“Crowd funding oli ol type blong platform we i nid blong encouragem, oli save mekem wan impoten contipution blong inkrisim akses long fianance we hemi wan jalenj long ol bisnis mo Non- profit organisation long Vanuatu.” Govenernor blong Reserve Bank blong Vanuatu, Simeon Athy, i talem long Press release.

“Mbe ol platform ia i nid blong operate anda long ol stret legal mo regulatory framework.

“I nogat any legal authoriti blong private compani blong ol reisem mani long pablic tru long ol platform olsem,” Governor Athy i talem.