PSC blong statem nomol duti

Public Service Commission bae i statem bak nomol seves long tomoro folem strik protocol.

Jeaman blong Public Service Commission, Simil Johnson i mekem kol long National TV tete aftanun.

“Public Service Commission bae i resume ful duti long tomoro mbe kontinu blong observem ol protocol(COVID rul),” Mr Johnson i talem.

“Ol kaen protocol long saed blong social distens, mask mo eni nara samting we hemi impoten blong observem blong kontinu blong provaedem seves. Nao long saed blong ol nara public service ofis blong ol ministry, mi biliv se yufala ol civil servants, ol Director General mo ol director yumi bin harem vinis se Council blong ol Minista i mekem sam disisen blong yumi kobak long wok. Mo public service hemi stap endosem disisen blong council blong kobak mekem ol wok.

“Wan hemi ol bisnis plan blong ko hed; olgeta ministry we oli no provaedem yet, mi stap rikwestem yufala blong provaedem long neks wik. Ol esential seves yumi save se bae hemi kontinu blong hemi wok mo ol ofisiol i mas mekem sua blong provaedem seves.

Mr Johnson i askem ol wokman blong Kavman blong mas tekem stik.

“Bambae commission hemi mekem disisen sapos yu we yu kat sam sik we yu tink se yu nosave tekem stik bae yumi faenem mo i mas kat wan spesel health ripot,” Mr Johnson i talem.

“Mo yufala we i fil oraet blong kam long wok hemi impoten blong kobak wok folem disisen we i kamaot vinis. Ol director mo director general i kat wok blong mekem se evri ofisa i komplae we i stap long staff manual o act blong public service.

“Sik ia bambae hemi stap, so yumi evriwan i mas wok tugeta blong faetem.”

Mr Johnson i talem bigfala tank yu long ol health wokman long hadwok we oli mekem naoia.

“Yufala i kontinu blong plei wan impoten role long kaontri,” Mr Johnson i talem.

“Kaontri bae i kontinu blong pray blong blood blong Jesus i kaverap yumi evriwan long taem olsem.”

 

 

(Visited 760 times, 1 visits today)

About The Author

You might be interested in