Push blong ol provincial ofis i mekem mani

Minista blong Internal Affairs hemi pusum ol provincial ofis blong mas faenem ol niu revenu opotuniti.

Bae Nasenol kavman hemi holem bak anual grant blong 2023 kasem we ol lokol aotoriti i givim ol revenue plan blong olgeta blong mekem mani.

Hemi wan muv we bae i save afektem operesen blong olgeta.

Long wan leta i ko long Director blong Local Authority, Leith Veremaito, Minista Christophe Emelee hemi resem konsen se ol staff long provins oli no stap kam ap wetem ol niu wei blong karem revenue(vatu) we i save helpem olgeta long developmen.

Minista Emelee hemi talem se taem Kavman hemi apruvum 2023 Budget long Palemen, bai hemi no kivim aot ol grant kasem we ol niu revenue plan hemi sabmit i ko long olgeta.

Secretary General blong Sanma Provins, Albert Ruddley. hemi talem se disisen bai hemi afectem operesen blong olgeta bigwan.

“Mi save komen lem hemi provincial staff salari wetem ol eria council secretary, implementation blong ol bisnis plan blong kota, espeseli fes kota mo ating seken kota mo constituensi alaowens blong ol Honoroble Counselor; Ating hemia nao ol tri mein eria we mi luk. Ating hemia nao bae i afek,” Mr Ruddley i talemaot.

Mr Ruddley hemi talem se be hemi agri long disisen we Minista i tekem blong help pushum olgeta blong oli mas wok. Hemi talem se Sanma provins i kat ol plans blong hem i stap finis, we i nidim nomo blong oli submitim.

Instraksen we Minista i putum aot hemi ko tu long ol Municipaliti.

Long wan yia, Lenakel Municipaliti hemi karem, VT11 million olsem grant mo Lugainville hemi karem VT6 million.

Mo evri six provins oli stap karem VT33 million long VT202 million budget we kavman i stap apruvum long wan yia. Hemi VT8.4 million long wan kota blong wan provins.

Sam Provincial ofisa we oli no wantem nem blong olgeta i kamaot oli talem se disisen blong Ministry hemi kam olsem wan shock long olgeta, mo oli talem se hemi eli tumas blong oli lukluk long eria ia from se provins i stap rikava yet long COVID.