Rabis rod kondisen long Not West Malekula i afektem ol fama

Eria Administrata blong Not West Malekula i talem se rabis rod kondisen i afektem ol fama blong salem ol produs blong olgeta blong winim vatu.

Not West Malekula i kat wan population blong 670, 1480 household we oli kamaot long 68 komuniti.

Jerryson Hosea i talem long VBTC News se hemia i wan urgent mata from pipol long eria blong Not West i mekem mani long copra, cocoa mo kava nomo.

Hemi talem se taem akses blong rod i nogud, ol fama ia i nosave pem skul fi blong ol pikinini blong olgeta.

“Mo samtaem fama i mas wet blong tri kasem fo manis blong ol othoriti i fixim ol fida rod ia blong hemi save tekem ol produs blong hem i ko long Lakatoro maket blong salem,” Mr Hosea i talem.

“Yumi mas save se pipol blong Not West eria blong Malekula nao i stap fulum ap maket blong Lakatoro.

“Mo taem ol fama i no kam mekem maket, maket haos ia i empti.”

Mr Hosea i talem se rod akses i no afektem nomo ol fama mbe ol nara seves olsem education mo health.

“Hevi ren we i bin hapen eli long yia ia, i mekem plante materiol blong ol skul mo helt olsem buk, pen mo ol meresin we i stap long Malampa ofis, trak i nosave kasem Not West blong distributum blong pipol mo ol skul pikinini i kat akses long hem,” hemi talem.

“Samtaem pipol i tekem ol materiol ia we oli save tekem mo walkbaut tu kasem 4 kilomita blong putum long ol skul mo health post.

“Ol smol health post long Not West Malekula i save tritim nomo ol smol sik mbe sps i kat wan aksiden naoia mo wan man i kasem bigfala kil, bae i had blong pipol i tekem hem i ko long Norsup hospital.

“Mi askem ol othoriti blong fida rod long Vanuatu blong lukluk long hem ia kwiktaem.”

Malampa Public Works Provincial Community Partnership Ofisa, Seth Simeon, i talem se oli save long konsen blong eria administrata, Mr Hosea, mo bae oli adresem taem Kavman i givim signal blong oli wokem ol rod long eria ia.

Hemi talem se eria blong Not West Malekula hemi wan eria long list blong wokem gud ol rod long Malampa.

“Yumi bin mekem sam rod wok blong 24 kilomita stat long Unwet kasem Lakhan nomo mbe afta long hem ia, yumi bin stop from mani i nomo kat,” Mr Simeon i talem.

“Mbe yumi bin mekem ol awareness raon long ol eria blong Malekula abaot ol rod wok ia we bae i stil hapen.

“Ol rod wok long eria blong Not west, Not east, Central mo Saot Malekula i stap long plan blong wok long hem.

“Yumi wet nomo long signal long mein ofis blong Ministry blong Infrastructure mo Public Utilities long Port Vila blong save kontinu long ol wok rod ia.”

Antoine Malsungai, Communication Ofisa blong Ministry blong Infrastructure mo Public Utilities, i talem se kavman i stap wok long wan plan blong helpem ol fama naoia blong kat gudfala akses blong rod.

Hemi talem se aelan blong Malekula hemi wan long ol aelan ia.

“Long namba 10 March, Ministry blong Infrastructure mo Public Utilities wetem Ministry blong Agriculture bae i lonjem wan plan akrimen blong help bidim ol gudfala rod blong ol fama long ol aelan,” Mr Malsungai i talem.

“Plan ia i blong helpem ol aelan we plante fama oli involv long sekta blong agriculture.

“Yumi kat seven aelan we bae yumi wok wetem, i kat Santo, Malekula, Efate, Epi, Tanna, Erromango mo Pentecost.”

Eria Administrator, Mr Hosea i talem se no mata long ol jalenj ia, oli talem takiu long wan kampani blong Santo we oli kolem Etworks we i save katem rod long Wilak kasem Leviamp.

“Hemia i wan long taem drim blong ol pipol blong Not West Malekula,” Mr Hosea i talem.

“Mo naoia mifala i stap wok blong traem konektem rod ia.”

VBTC News i traem blong kasem ol aothoriti long Ministry blong Agriculture mbe i no posibol.

Eria Administrata, Mr Hosea i lukaotem eria blong Not west Malekula A  long eria blong Botovro kasem Wilak.

Mo Not West B eria we i stat long Wiaru kasem Lasanwei mo Wiawi.