Radio Prokram blong helpem ol yangfala i faenem wok

Ol yangfala we i no kasem wok yet oli save benefit long wan radio prokram we oli kolem Wok Redi Prokram.

Wok Redi Prokram ia bae hem i stap kamaot long Radio Vanuatu mo Femme Pawa 99FM long everi mandei, wednesdei mo Fraedei long everi wik.

Long wik ia, Australia Pacific Technical College mo Department blong Labour i lonjem program ia blong helpem ol pipol blong save finem wok.

Country Director blong Australia Pacific Technical College, Anna Naupa, i talem se folem COVID-19, hemi impoten blong kamap wetem prokram ia blong helpem ol man ples.

“Hao nao yumi priperem yumi long ol difren kaen wok, we yumi nid blong tingbaot long wan taem we laef mo wok hem i stap jenis bigwan olsem we yumi neva tingting se bae i posibol,” Mrs Naupa i talem.

Commissioner blong Labour, Murielle Meltenoven, i talem se prokram ia bae i helpem ol pipol truaot long Vanuatu we oli kat ol skil blong mekem ol wok.

“Prokram blong tetei bae hemi benefitim ol citizen blong yumi from bae hem i kivim yumi wan janis blong yumi save kriatem wan wok redi prokram blong alaoem ol wokman blong yumi blong oli pat long domestic maket mo intanasonal maket blong yumi blong oli gat wan wok redi skil set we bae hem i save benefitim olgeta not only long leba mobility prokram mbe long domestic maket blong yumi tu,” Mrs Meltenoven i talem.

Australia Pacific Technical College mo Labour Department i wok tugeta wetem VBTC, Wan Smol Bag Theatre mo Island Media blong putumaot prokram ia.

Chief Executive Officer blong VBTC, Francis Herman, i talem se radio hem i pleiem wan impoten role mo prokram ia bae i ko aot long everi pipol.

“Hem i ol prokram olsem ia we i help blong bildim kapasiti, ol skil blong ol pipol we yumi sevem, ol pipol we mi sevem,” hem i talem.

Deputy Australian High Commissioner long Vanuatu, Susan Ryle, i talem se prokram ia Australian Kavman nao i fandem.

“Hem i wan impoten patnasip bitwin Vanuatu mo Australia blong strenktenem link bitwin ol komuniti blong yumi. Mo provaedem ekonomik benefit blong everiwan,” Ms Ryle i talem.

Program ia hemi includim olsem wanem blong raitem leta, mekem Curriculum Vanuatu, mo sam nara infomesen we hemi impoten long area blong wok.

Wok Redi Prokram ia hemi stap long ol difren episode, mo bae oli airem tru long Radio Vanuatu mo FEMME 99FM long everi 4:30pm long ol trifala dei ia.

(Visited 365 times, 1 visits today)

About The Author

You might be interested in