Ranon i askem bak education seves

Ranon Secondary skul long Ambrym i askem blong education seves i kobak.

Skul ia, i bin stop smol taem long Novemba, folem wan leaf namele we ol stret land owna blong skul ia oli putum from i nosave kat developmen.

Jamie Manjob Lonon, Custom Land Owner blong Ranon Secondary skul we i bin hangem leaf namele long Novemba i talem se i gat sam fasin we ol man we oli live long eria kolosap long skul ia oli mekem blong stopem developmen long skul.

Mr Lonon i talem se hem olsem land owner i bin wandem blong moa developmenti hapen long skul ia, mbe i gat sam pipol long eria kolosap i stopem.

“From reason ia nao i mekem se mi bin ko moa hangem leaf namele blong mifala i sitdaon mo stretem,”Mr Lonon i talem.

Long wik ia, ol disput pati wetem kastom lan owna i bin ko tugeta mo talem sori long kavman tru long Ministry blong Education blong skul ia i save operate nomol bakegen.

Mr Lonon i talem se Ranon hem wan long bigfala skul long Ambrym we i provaedem education seves long bigfala namba blong ol skul pikinini.

Hemi talem se sapos kavman i klosem bai ol parents i faenem i had blong sendem ol pikinini blong olgeta i ko long ol narafala skul.

Minista blong Education mo Training, Honoroble Samson Samsen i talem se kavman hemi akseptem tok sori mo hemi asurem olgeta se ol seves bai i kobak normal long 2022.

Minista Samsen i askem ol land owna blong mas folem stret proces blong Lands Dipatmen blong pem graon mo gat ol grin certificate.

Hemi talem se wei ia nomo i save gat ol developmen long skul ia.

 

(Visited 572 times, 1 visits today)

About The Author

You might be interested in