Reform long Public sector

Reform blong Public sector i stap insaed long 100 dei plan blong niu Kavman blong rimuvum politikol interferens.

Niu Prime Minista, Alatoi Ishmael Kalsakau i talem se plante taem ol politisen oli draevem ol politikol agenda blong olgeta ova long ol rikwamen blong state.

Mr Kalsakau i talem se jenis ia i save givim wan strong efektiv system.

“Sapos yu faenem wan wei blong i kam tru long window bae yu mas faenem wan wei blong yu i kobak aotsaed long system,” Prime Minista Kalsakau i talem.

“Yumi bringim ap pipol beis long merit(pepa). People we oli redi blong pefom. People oli luksave se politik hemi provaedem polisi mo yu nao yu implementa blong hem blong i kat stret maj.

“Bae i tekem taem, bae i kat sam pipol i harem nogud. Long en blong dei bae i tekem aot politikol interferens. Blong perform mo mekem i wok ol polisi we ol politicians i tekem i kam insaed.”

Mr Kalsakau i talem se politik i mas maretem administresen blong mekem se tufala i no ron long ol difren daereksen o agenda.

Council blong ol minista i sitdaon wetem ol Director General blong ol Ministri mo diskasen i stap gohed finis long wik we i pas.

“Narafala strategi, hemi blong lukluk long recruitmen proses insaed long public service mo strengthenem ol polisi blong olgeta,” Mr Kalsakau i talem.

Prime Minista Kalsakau i talem tu se wetem isu blong ol vehicle blong kavman long ol pas yia i kam, i mas kat wan strong vehicle polisi naoia.

By Agnes Herbert.

 

 

(Visited 1089 times, 1 visits today)

About The Author

You might be interested in